باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و وېس و پەنجەمە
میرزا ئۆلقاڎرو پاوەی چی بەشەنە باس جە ژیوای محەمەدی کەرۊن کە چەنی ڕوحەلئەمین، بېیەن بە موعەلیمش، ئاماڎەش کەرۊن پەی وەرگېرتەی پېخامو ئیلاهی.
هەر بە عیبادەت، شای فریشتە خۊ
ڕۊ مەکەرد، وە شەو، شەو مەکەرد وە ڕۊ
حوجرەی دەروونش، وە حوکمی شاهی
مەنقووش بیی، بە نەقش زاتی ئیلاهی
ڕۊحەلئەمین، بیی بە موعەلیمش
لەفزی قورئان، کەرد بە تەکەلومش
جە خاودا، عیلمەلیەقین واتەن پېش
ڕەمزی سەماویی ئاشنا کەردەن لېش
سینەی بۍ کینە، ساف و مەحفووز کەرد
شارەزای ئەوزاع، لەوحەلمەحفووز کەرد
یاوا، وە حەڕا، بورجی ڕیسالەت
سوبح جە کۊی بەتحا، شەمسی نبوەت
باڵاش بی بە جای حیلمی ستایېش
وە خاتەم، تەڵعەت، دریا، ئارایېش
جە لوتفی بۍ چوون، یەزدانی بۍ باک
فەرقش، قایز بی، بە تاجی لەولاک
دەروونی پاکش، چوون ئاینەی جام
مەنمانا، دنیا، جە قاف تا بە قاف
وەحشی و تیوور و خاک و هەرد و بەرد
یەکسەر، گرد، چەنیش گفتوگۊ مەکەرد
شیرین، حەیاو حیلم، شیرین داد و دەنگ
شیرین خوڵق و خۊ، شیرین شېوە زەنگ
مەولای ڕوداری خاسش فەرماوان
چوون، بە ئیرسییەت، بە حەزرەت یاوان
ئەگەر موعجیزەش نەویا، چېو تەری
جەماڵش وەس بۍ، پەی پېغەمبەری
ئیپتیدای دنیا، تا وە ڕووی مەحشەر
جوملەی موسەنیف، واسیفان، یەکسەر
گرد وە تەسنیفات، تا وە ڕووی مەردەن
کەس وەسفی حەزرەت، تەمام نەکەردەن
غەیر، جە خوڎاوەند، وەسفی ئەو زانان
جە کەلامی وېش، مەدحی ئەو وانان
وەسفش، جە سوحف کەردەن، پەی ئادەم
پەی شیت و ئیدریس، دایېم دەمادەم
پەی مووسای کەلیم، دایېم جە تەورات
چن کەردەن، سەنای، خواجەی کائینات
پەی نووحی نەبی، دیسان هەم پەی هوود
وەسفش، جە زەبوور، کەردەن، پەی داود
چن جار، جە ئینجیل، ئەوسافی خاتەم
خوڎا، کەردەن، پەی عیسا بنی مریەم
سی جوزئی قورئان کەردەن خەڵاتش
یەکسەر ئیشارەن، جە موعجیزاتش
ئەغڵەب، ڕمووزات پای پەشت بەردەن
خوڎا، حیکایەت، پەی حەزرەت کەردەن.[1]