#میرزای لوڕستانی#
ھۊرگېڵا لوا ئەمیری نامدار
شی بە جاگەی وېش خاتۇنی نازدار
دۊعاش کەرد ئەمیر بە ئەندۇهی دڵ
یا ڕەب ڕەحمەتێ جە سەر کەی نازڵ
بەڵۍ پەی دەفع جۇدی غوبار بۊ
دەماغی شکار ئەمیر ئېزھار بۊ
بە ئەمری فەرمان لامەکانی فەرد
مەقرۇن جە ھەدەف ئېجابەت وېیەرد
ئەو شه و بارانێ نزۇل کەرد جەبار
موزەیەن کەردش دەشت و کۊھسار
سەحەر ئەمیر وات بېیارانی یار
جاڕدەن وە شار دا مەشۇن وە شکار
چاوشان جاڕدان یانە بە یانە
جە ئەھلی جزیر خوېش و بېگانە
حازر بان تەمام جە ئەھلی شکار
ھیچ کەس جە یانە نەگېرۊ قەرار
دان نە تەپڵی باز کۊچەها بەندن
کڵاوە جە فەرق شاھېنان سەندن
مەم کە سەرڕاو بی نەیاما بە وەر
میر پورسا جە مەم چېش ئاما بەسەر
تاجئەلدین واتش میری بۍ نەزیر
مەم ئازاردارەن عاجز و زویر
مەتاوۊ بەیۊ ئېم ڕۊ وە شکار
ماتەمەن دڵگیر، زایېف و زگار
ئەمیر چۇن شنەفت وات ئاوازکەران
بېیان ئەو دما تەمام نۊکەران
نمەشۇن بۍ مەم ئېم ڕۊ وە شکار
بگېڵان ئەو پەس پېیادە و سوار
ئاما وە گوفتار تاجئەلدین جە نۊ
واتش دەوڵەتت یار بۊ ڕۊ بە ڕۊ
واپەس نەگەردان سوارانی ڕاو
جە تەنخوای ئەمیر بەنگین بۊ سەرڕاو
ھەر وەقت کە ئەمیر شفا یاوا پېش
ئەڵبەت بە شکار مېیاوۊ پەی وېش
قەبۇڵکەرد گوفتار تاجئەلدین ھەمان
لەشکەر تەمامی ڕەوان بی ڕەوان
ئین بار جەو دەم دا خاتۇنی گوزین
ئاما وە بیرۇن چۇن ماھە و پەروین
یاوا بە خدمەت ئەمیری دۆڵبەر
نېشتن چەنی ھەم چۇن شەھد و شەکەر
شین نە ڕۇی دۊشەک لەحافی زەڕین
کەردشان ڕازان وېیەردەی وەرین
پەرێشان کەردن سونبۊڵ چەنی گوڵ
بوڵبوڵ مېنقار ژەند نە ڕۇی پەڕەی گوڵ
چەھچەھە و ھەزار دەم وە پەڕەی گوڵ
عەندەلیب ماچۊ مراد بی حاسڵ
عەیشێ سازنان دۇ عاشقی زار
قەند چەنی شەکەر وە لەب کەردن بار
ئەر کەسێ مەشی نەو ڕاﮪ ڕاهگوزار
نەبات چەنی قەند مەبیش وە نسار
تېغی زەھراڵۇد جە نافەی بوار
قەرار دا نە بەین دۇ یار دۇ دوڵدار
نمەز چېش واچۇن سەرئەنجامی کار
ھەر دۇ شین نە خواب ڕاحەت بۍ قەرار
لەب وە بان لەب وە ھەم پەیوەستن
نەم نە سەرچەشمەی حەیوانی بەستن
[1]