باخچێوە بېگەرد
ئاماڎەکەرڎەی: ئەسعەد ڕەشید
بەشې سەڎ و وېس و نۊهەمە
دمای دوې یەرې ڕوا، حەزرەت تەشریفش پەی مەڕەو (حەڕڕای) بەردۆ، دیسان جوبرەئیل لواوە خزمەتش، محەمەڎش چڵاکنارە، گفتوگۊ میانشانە ڕوەشدا، یەرې دەفحې تەر فشاراش وېشەرە، دماتەر محەمەڎ لواوە پەی یانەی:
تا کە دوو سێ ڕۊ، جە مابەین وېیەرد
حەزرەت، هەم وە غار حەڕڕا، تەشریف بەرد
تەن وە تۊی لیباس پارچەی قەشەنگێ
جە نۊ تەکیەدا، وە بانی سەنگێ
دووبارە، ئاما، ئەخی جوبرەئیل
وات: یا محەمەد هۊرزە وە تەعجیل
حەزرەت، دیا، دیش، شەخسێ موڼەوەر
مدران، وە پاوە، چوون شوعلەی قەمەر
ئەو هەم، جە شۊنش ڕاهی بی، نە ڕا
گوزەر کەردشان، تا وە کۊی سەفا
جوبرەئیل قەدەم جە ئەرز مەحکەم کەرد
جە ناگاه، هەم سەر وە ئاسمان بەرد
پەڕی شاباڵش، ئەفشان کەردۆ
مەشریق، تا مەغریب، دنیا شەردەوە
پا سورخ باڵ سەبز، سەرباڵش زەردەن
یەک گەردەن بەندیی، یاقووت نە گەردەن
مووی سەر، چوون مەرجان، پیشانی بلوور
ڕوخسارش ڕەنگین، ڕەنگی هەزار جوور
جە ڕووی پېشانیش، بە خەتی زاهیر
کەلیمەی، شەهادەت، تەبیبەی تاهیر
ئەوەڵ (لا الە الا اللە) هەن
دوەم، محەمەد ڕەسوولەڵڵا هەن
حەزرەت، حەیران، مەند، جەی پەڕ و باڵە
جەی قەڎ و قامەت، جەبهەی جەماڵە
فەرما تۊ کېنی، ڕەحیمەکوموڵڵا
هەم نامت چېشەن، ئیبن عوبەیدوڵڵا
نەڎیەنم وە چەم، هەرگیز وېنەی تۊ
وەیتەورە، قامەت، بوزورگی نیکۊ
وات: من جوبرەئیل فەرمانبەردارم
پەیکی پادشای، دانای قەههارم
وە لای ئەنبیاء، جەمیعی مورسەلین
هەر من نازڵ بییم، وە ڕووی سەر زەمین
تۊ، ئەی محەمەد، دیسان، بوانە
من مامووری تۊم، ماوەر بەهانە
حەزرەت، وات: سا من چە تەور بوانووم
هیچ نەوەندەنم، هیچ نمەزاووم
جوبریل بەو تەور، وشاراش بە جۊش
مەحەل بې حەزرەت، بەربشۊ جە هۊش
باز، وات بزانە، من ئوستادی تۊم
ماموورم، بە ئەمر، شای فریشتە خۊم
شای خەتمی پەنا، جەوابی تەعجیل
دیسان هەم جە نۊ واتش جوبرەئیل
باز هەم جوبرەئیل، وە سەڎ جەهد و جەخت
حەزرەت، وشارا، وە فشاری سەخت
سێ نۊبەت، ڕوو دا، ئەی قیل و قالە
ئەی وەحی ڕەحمەت، جەنگ و جیدالە
بە قەولی ڕاوی، ڕەوزەتولئەحباب
جەودما حەزرەت، شای فەلەک ڕیقاب
تەشریفی حەزرەت، موراجەعەت کەرد
فەڕڕ و قەدەمش، هەم وە مەنزڵ بەرد.[1]