#میرزای لوڕستانی#

ڕەوان بین دەردەم پەی عەزم بیرۇن
بڎیە چېشش کەرد چەرخی پەڕ فنۇن
چەند ڕۇزێ گوزەشت نە مابەینی کار
جە نۊ سازنان سەحاری و بەدکار
زەیندین زېیافەت درۊستکەرد پەی میر
دەعوەت کەرد ئەو ڕۊ میری بېنەزیر
لوا وە خدمەت ئەمیر چۇن شای مەم
نېشتن بەرابەر ھەر دۇشان وە ھەم
وەقتی شام ئاما سفرە ئاوەردن
ئەلوان تەعامان نۊشی جان کەردن
قەلیان (و) قاوە ئاما نە دیوان
عەزمی نەردبازی ئاما نە مەیدان
نەردشان ئاوەرد ئامان بە دڵواز
مەم چەنی زەیندین ئۆیین کەردن ساز
مەم وات وە ئەمیر دڵواز بۊ وە ھەم
زەیندین وات بەڵۍ بۊ وە بانی چەم
دۇ سێ مەرتەبە کەردشان ئۆیین
میر ئەغڵەبەش کەرد جە ئەمیر زەیندین
بەکر جەو دەمدا فېکرێ کەرد نە کار
شی وە ئەندەرۇن نەکەردش مەدار
وات بە خاتۇ زین نە ڕۇی بەھانە
میر فەرمان بەیۊ وە دیوانخانە
نە ڕۇی پەنجەرە مەنزۇر بدەرۊ
چەنی مەم دڵواز شەترەنج مەکەرۊ
دەردەم بەرئاما خاتۇن وېنەی ماﮪ
نە ڕۇی پەنجەرە مەکەردش نگاﮪ
ئەو ڕۊ شای ئەمیر خەیلێ بی غالب
شاە وە یەک ئۆیین ھیچ نەبی تاڵب
ئامای خاتۇن واقف نەبی مەم
جە قەفاشۊوە مەنزۇر دابۍ چەم
ڕۇکەرد وە بەکر چېش ئامان بە وېم
ئیم ڕۊ ھیچ نەردێ نمەیۊ پەرېم
ئاما بە جواب بەکر سەرئەنجام
وات تەبدیل کەران ھەر دۇتان مەقام
ئېقامەتش کەرد میر زەیندین دەردەم
میر وە جای ئەمیر، ئەمیر وە جای مەم
نېشتن ھەر دۇشان بەرابەر نە جا
ئەمیر بوڵەند کەرد دۇ چەشمی شەھلا
دیش وە چەم خاتۇن نە ڕۇی پەنجەرە
ئەرواحش لوا جە تەن یەکسەرە
چەشمش موعەلەق دەرۇنش پەڕ ڕەنج
نمەدیش وە چەم خانانی شەترەنج
نمەزاناش داش فەرز وە کۊل کامەن
ڕۊخ و شاھ جە کام جاشان مەقامەن
داشانی شەترەنج مەشانا یەکسەر
ئەما جە دەرۇن ھیچ نەبېش خەبەر
چەند ئۆیین جە بەین ھەر دۇشان وېیەرد
ئاخر ئەلئەنجام زەیندین گرەو بەرد
ڕۇ کەردش وە مەم ئەمیر وە ڕازی
واتش نەسەندم داو و دەستبازی
ئاما بە جواب ئەمیری غەمبار
حاشاییم نېیەن جە لوای ئی کار
ھەر ئېدعات ھەن بوازە وە کام
ئېختېیارداری باقی وەلسەللام
فەرما وە خاتۇن بۊ وە ئەندەرۇن
دۇ دەستش ببەند بەبۍ چەند و چۇن
[1]