#میرزای لوڕستانی#
ھۊرگېرتن لاشەی ئەمیری ئەمیران
بەردن پەرۍ شار کارسازیش کەران
ئەساسی شۊرش موھەیا کەردن
بە ڕەسمی شاھان تەمام ئاوەردن
شۊستن لاشەی پاک کافۇر ئەندازش
عەترئامېز کەردن جاگە و جەنازش
نېیان نەو کەفەن لاشەش دەر زەمان
وەندشان چەندێ ئایاتی قورئان
ھۇن سېیاوەحش جە نۊ جۊشاوە
ستۇنی ئەیوان کەیوان کېشاوە
ناگاﮪ پەیدا بی چەندێ جە سوار
پېشان بۍ چەند ڕەخت چەند تاج و تۊمار
سەقر و باڵەبان، باز و شاھینان
زەڕین قەڵلادە باز و باڵەبان
پېیابین جە زین تەمامی دەردەم
پورسان ئەخبارات وەرینانی مەم
بەنگین نگەکەرد چۇن نە ڕاگەی دۇر
دەردەم شناساش حەکاکان دەستۇر
جە نۊ زایەڵەی فوغان و زاری
خېزیا جە بەین مەردانی کاری
تەمام ئەھل شار ئامان وە دامان
کەردشان شیوەن زاری فەراوان
ئەسر شینگېڕان زەمین کەرد قرمز
خۇنابە خېزا جە ھەر بۇم و مەرز
ئەر بەیانکەرۇ فېشتەر ئەخبارات
ئاھېر مەگېرۊ تەمام سەر بەسات
ھۊرگېرتن تابۇت شازادەی غەریب
ئەو جا ئاب و گڵ کەردە بېش نەسیب
بە ڕەسم و ئاداب بە ڕەویەی وېشان
سوپەردن وە خاک خاتر پەرېشان
یاران ھۊرگېڵان ئامان ئەو دۊما
باز ھەم لاشەی مەم بە جا مەند نە جا
بشنەو جە بەنگین یاوەران ئین بار
بڎیە چېشش کەرد یاری وەفادار
سواران نیلی ئەسپان ھەم نیلی
قۊشان قەڵاخی تەولەھای فیلی
بەیداقێ جە نیل نیلی کەرد وە پا
گرەو بەردەبۍ جە نیلیی سەما
نیل جە ھندستان ئاما وە قیمەت
ئەوەند نیلی کەرد بەیداقانی بەت
پایەی قورتاسان جێوەتی زەڕدۊز
سېیاو کەبۇد گرد ماتەمی ئەفرۊز
ھېمەت خواھېش کەرد ئەعلا تا ئەدنا
تەپڵی شیوەن ژەند ڕاھی بی نە ڕاﮪ
ئەم جار بشنەوە عەجەب داستان
جە ڕۇی ڕاستیۆ بکەرۇ بەیان
یەک شەو ھەوای تار داجی دەیجۇر بۍ
ماﮪ و ستارە ھەر دۇ بۍ نۇر بۍ
سەیلاتی باران مەڕېزا بە وار
وېنەی سەیلی ئەشک عاشقانی زار
میر زەیندین ئاما وېش گېرت نە پېوار
دېیا وە جانېب خاتۇنی نازدار
نە پای سوپای سەیل مدران بېقەرار
دەم دەم مەگرەوۊ پەرۍ مەم زگار
ناڵەش بەر مەشۊ وە ماﮪ و سەیار
گڕەی دەرۇنش گڕانتەر جە نار
[1]