باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و پەنجا و ششەمە
نەجاشی، بە جوابەکا جەعفەری وەشحاڵ بی، زاناش ئانەی کە ئاڎ باسشکەرۊن و تاریفېش مڎۊن، پېخامئاوەرو ئاخر زەمانییەن، نەجاشی وېش پەنە نەگېریا، هەرسی بە خۊڕ مجېرە، نزیکەکېچش دەسشان کەرد بە گرەوای، نەجاشی واتش؛ مەعلوم بۊ لېتان کە تەورات و ئینجیل و قورئان هەریەر جە یەک جا ئامێنې، پی تەرزە:
نەجاشیی پەرسا هیچ هەن جە لاتان
جەو ئایەی شەریف کەلاموڵڵاتان
جەعفەر وات: بەڵ ئەی شاهی دانا
سوورەی (کساف، ها، عەین، صاد) وانا
بې شک تاسیرش سەنگ مەکەرد بە ئاو
دڵ و دەروونش مەکەرد بە کەواو
نەجاشیی وە جۊش ئەوەند کەرد گرین
سککەی سفیدش تەڕبیی وە ئەسرین
موقەرەبانش یەک یەک گرڎ حەزین
گرڎ سەیل ئەسرینان ڕېزنان زەمین
واتش: ئەی کەلام جە خاس دەلیلەن
ناسخی تەورات نەسخی ئینجیلەن
مەعلووم بۊ جە لای گرڎ سوخەن دانان
هەر سێ ئەی کەلام نە یەک جا ئامان
جەو دما واتش: من ئەی جەماعەت
پەرێ ڕووی دنیا هەرگیز یەک ساعەت
مەدەون وە دەسی قوڕەیشی مەغروور
ئەگەر پېم بدات بەهای یەک کلوور
وات: جە موڵکی من بە فەراغەتی باڵ
بنیشن ساتێ تاکە هەزار ساڵ
بەرات و ئەنعام، مدەروون پېتان
تەرخانی مەعاف ساکن پەی وېتان
ئیبنی ڕەبیعە چەنی عەمر و عاس
نائومېد بەرشین هەم بە نائیخلاس
هەرکەسێ ئەزیەت بە ئېوە دەرۊ
بېجا مەکەرۊ سەر وە سەنگ دەرۊ
دەستی زوڵمی کەس نەمیاوۊ پېتان
مەشغووڵ بین بە ئەمر مەعبوودی وېتان
تاکە بزانین جە بازیی چەپگەرد
چەرخی ڕوژگار چېش ماوەرۊ نەرد.[1]