باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و پەنجا و حۆتەمە
باس جە پەلامارە بې ئەدەبانەکا ئەبوجەهلی مەکەرۊن وەراوەر بە پېخامئاوەری (د.خ) ، دیسان باس جە ئەدەب و بېدەنگی حەزرەتی مەکەرۊن، ئەچا کاتەنە کەنیزەکێ گۊشش جە قسە بې ئەدەبەکا ئەبوجەهلی بې، دماتەر دلې کابەینە گېڵنێشۆ پەی حەمزەی، مامۊ پېخامئاوەری:
چوون یەک ڕۊ حەزرەت شای خەیرولئەنام
عەلەیهی وە ئالیهی سەڵەوات وەسەلام
حەبیبی حەزرەت دەهەندەی داوەر
تەمام شاڎیی دوژمنان پەی کەر
شاهسوار هەردش مەکانی تەیی کەرد
ڕیشەی موشریکان جە خاک بەرئاوەرد
سالاری مەحشەر ڕووی دارلقەرار
ئەمینی دیوان مستەفای موختار
جە دەستی موشریک، ئەوقاتش تاڵ بې
ماییل وە سەحرا بېزار جە ماڵ بې
تەشریف بەرد جە بەین خەوف و ڕەجاوە
بە مەحزوون پەشتدا وە کۊی سەفاوە
ناگا ئەبوجەهل عەلەیهللەعنە
پېڎابی جەودەم بە تیر و تەعنە
چن بیجا واتش چن جەسارەت کەرد
چن کردەی بابۊی لەعینی وېش وەرد
خەیلێ ئەو سەگ زی چوون سەگ گەفا لېش
حەزرەت خجڵ مەند جە بېکەسیی وېش
چوون بەڎ گوفتاری دوربی جە زاتش
موتڵەقەن نەکەرد هیچ مەکافاتش
غەرەز ئەبو جەهل گومڕای بەڎ ئەتوار
دیشان کە حەزرەت ناما بە گوفتار
چوون ڕەسمی حەزرەت هەر سېڕ پوشی بې
جەواب ئەبلەهان هەم خاموشی بې
لەعین گېڵاوە چوون سەگ جە داوا
تاکە بە مەجلیس قوڕەیش هەم یاوا
جەو دەم یەک عەورەت چوون ماهی تابان
مەشهوور بە کەنیز عەبدوڵڵا جەزعان
گفتوگۊی بو جەهل گومڕای بې وەفا
یەکایەک شنەفت جە باڵای سەفا
جەو دما حەمزە شېری سەنگین سام
عەمۊی موکەررەم شای خەیرولئەنام
جە شکارگای وېش موراجەعەت کەرد
تەشریف وە تەواف کەعبەتوڵڵا بەرد
سیلاحی ڕووی جەنگ پۊشابې بە داو
کۊی خارا مەبې جە سامش وە ئاو
کەنیز شیی وە لاش وە دڵ ناکامی
واتش: ئەی ئەمیر نامڎاری نامیی
پەرێ محەمەد جەرگم مەڎۊ جۊش
غوسسەی دنیام گرد بییەن فەرامۊش
ئارۊ ئەبوجەهل کارێ پېش کەردەن
یانی های جە حەدد حیساب ویەردەن
دڵ ڕېزە ڕېز، دەروون خاشخاشم
بە خوڎاحەیف، سەڎ حەیف، پەی بەنی هاشم
جە دەورانی دوون پەند بی غیرەت بان
زیڕ دەستە مەردوم ئەونا وەسەت بان.[1]