باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و پەنجا و هەشتەمە
هەواڵو بې ئەدبییەکا ئەبوجەهلی یاوا بە حەمزەی، مامۊ پېخامئاوەری، ئاڎیچ بە پەلە لوا پەی کۊنیشتو قوڕەیشیەکا، چاگە پەلامارەو ئەبو جەهلیش دا، داش تۊقەو سەرەیش، حەمزە ماچۊ: ئەچی ساتۆ، من ئیمان بە دینەکەو محەمەڎی ماروون:
حەمزە ئېد شنەفت سیابی جە قار
ڕوو کەرد وە مەجلیس تایفەی کوففار
دەس بەرد ئەو کەمان دوو حاجە سەنگین
داش وە فەوق فەرق ئەبو جەهلی لەعین
نەکەردش ئەندېش جەوقیلانی مەست
وە یەک زەرب فەرقش یە هەفت جا شکەست
واتش: تۊ بېجا غەڵەت کەرڎەنی
نامی برازای بەندە بەردەنی
من هەنی تەسدېق دینی ئەو داروون
هەنی خوڎای ئەو وە چەم مەداروون
ئەگەر تۊ مەردی من هام نە بەر دەم
بەو تەور کەرڎەن پېت، ئیسە پېت کەرڎەم
چەودما حەزرەت حەمزەی نامەوەر
هەم شیی وە خزمەت شای خەیرولبەشەر
وات: یا محەمەد ئارۊ مامۊی تۊ
حەققی تۊش سەندەن جە عەدووی بەدخۊ
حەزرەت واتش: من، بېکەس مەویاروون
نە پدەر، نە عەم، نە ئیخوان داروون
بغەیر جە مەعبوود ڕەببەلعالەمین
من کەسم نییەن نە ڕووی سەر زەمین
حەمزە وات: بە تۊ من عەهدم بەستەن
فەرقی ئەبو جەهلم پەی تۊ شکەستەن
بزان بە تەحقیق سەرم ها نە ڕېت
جە شاه، تا گەڎا، چېوێ واچان پېت
حەزرەت وات: ئەی عەم ئەوەند مەدەر لاف
جە مەککەی شەریف هەر تا وە کۊی قاف
موشریکان یەکسەر گرد قەتڵ و عام کەی
حەبەش و قوڕەیش یەهوود وە شام کەی
تۊ هەر ئەو سوار، من ئەو پیادەم
نە تۊ عەم نە من، برادەر زادەم
حەمزە قەوڵی ئەو بە دڵ کەرد قەبووڵ
ئیمانش ئاوەرد بە خوڎا و بە ڕەسووڵ
حەزرەت بە شاڎیی فەرەح یاوا پېش
بین بە هام خەیاڵ چەنی مامۊی وېش
سەحابان بە زەوق تەکبیر واناشان
قەبیلەی قوڕەیش یەکسەر زاناشان
واتشان: محەمەد قەوی بی دینش
ئەو باخەن حەمزە بیی بە پەڕچینش
ئەو گوڵەن، حەمزە نە دەورش خارەن
دینش مەحفووزەن، وېش بەرقەرارەن
جە حەمزە خەیلێ ستایېش کەرڎەن
نامی حەزرەت هیچ وە بەڎ نەوەردەن.[1]