باخچێوە بېگەرد
ئاماڎەکەرڎەی: ئەسعەد ڕەشیڎ
بەشې سەڎ و شەسس و چوارەمە
ئا ڕوە پېخامئاوەر یانەو حەمزەی بې، عومەر داواش کەرڎە ئەو (جەنابی و سەعدی) بەراش پەی خزمەتیش، پەی ئیمانئاوەردەی بە دینەکەیش، گرڎشان ڕوەو یانەو حەمزەی کەوتې ڕا. یاوەرەکې پېخامئاوەری گرڎ وېشا گلېرکەردۆ و بە دڵ تەرسێ چانەیە کە ئایا عومەر پەی چېشی ئامابۊ، پەی جەنگی یام ئیمانی:
یە خەیلێ وەختەن فیراقەن جە بەین
بیاونەم وە لای سەیدولکەونەین
تا چوون پەروانە دەوری شوعلەی شەم
خاکی نەعلەینش بماڵوون نە چەم
جەناب و سەعید هەردوو چوون ڕەهبەر
شین وە ها مقەدەم خاک پای عوممەر
ئان یەک سەعات، ئەگەر زوو یا دېر
یاوان وە قاپی قەسری حەمزە شېر
بەڵې چوون تەشریف موستەفای موختار
ئەو ڕۊ جەو مەنزڵ گرتەبې قەرار
یاران جە قاپی دەقلباب کەرڎەن
سەحابان یەک یەک سەر بەر ئاوەردەن
دین عوممەر قەبزەی دوورش هانە دەست
مدران موسەللەح وېنەی شېری مەست
سەحاب گرڎ جە خەوف یەکسەر بین ماتەم
قوفڵی قاپیشان جە نۊ کەرد مەحکەم
سەحابان خەبەر وە حەزرەت داشان
چمان گرڎ قابز ئامان وە لاشان
واتشان: هانا یا خەیرەلبەشەر
اللهم احفظ من شر العمر.
مدران موسەللەح وېنەی خار سەنگ
ئیرادەش سوڵحەن نمەز یاخۊ جەنگ.[1]