باخچێوە بېگەرد
ئاماڎەکەرڎەی: ئەسعەد ڕەشید
بەشۍ سەڎ و شەسس و ششەمە
میزا ئۆقاڎرو پاوەی، ئەچی بەشەنە باس جە دەور و هەم ئازایی چوار یاوەرە نزیکەکەو پېخامئاوەرو ئسلامی (ئەبوبەکر، عومەر، عوسمان، عەلی) مەکەرۊن، کە پېسە قەڵغانێ پوڵایینی تاوانشان چەنی چن یاوەرێ تەری پارېزگاری جە محەمەڎی و دینەکەیش بکەران:
هەر چوار سالار هەر چوار سەروەر
کەردشان مەحکەم دینی پېغەمەر
بەیداغی ئیسلام کەردشان وە پا
سەڵەوات دان وە دین دیڎەی موستەفا
هەرچوار ئەمیر حەزرەت پادشاه
هەر چوار کەوکەب حەزرەت وېنەی شاه
بە ئەمری خوڎا قەولی پېغەممەر
ڕاگەی هیدایەت گرتشان نە وەر
غەیر جە خولەفای ئەعلای ڕاشیدین
ئەسامی باقی سەحابەی گوزین
زەید حارس سەعد بنی وەققاس
سەعید بنی زەید پاکی پەڕ ئیخلاس
حەمزە و بیلال هەم تەلحە و زوبەیر
کوشندەی کوففار ڕەهبانانی دەیر
بەعد ئیبنی عەوف چەنی بنی مەغتوون
شېرانی بۍ باک شەیدای چنگ نهوون
ڕانندەی ئەسرار ڕای خەیر و سەلاح
ئەبو عوبەیدەی شېر بنی جەراح
ئەبو سەلمە چوون شېری دژژەم
چەو دما ئەرقەم ئەولادی ئەرقەم
تا (سی و نۊ) نەفەر سەحابەی کیرام
وە حیساب یاوا ڕابەری ئیسلام
جەنابی فارووق یانی بن خەتتاب
عەرز کەرد نە خدمەت شای گەردوون ڕیکاب
واتش: یا ڕەسوول ڕۊحم فیدات بۊ
سەرتاپای جەستەم سەرگەردی ڕات بۊ
موناسیب نېیەن، هەنی دینی تۊ
جە خەوفی قوڕەیش وەیتەور پەنهان بۊ
شای خەتمی پەنا قبووڵ کەرد بە دڵ
غونچەی دەماغش شکوفا چوون گوڵ
چوون کەوکەب نە دەور دایەرەی قەمەر
چەنی سەحابان تەشریف بەرد وە بەر
جە شانەی ڕاستش سیدیقی ئەکبەر
پەی حیفزی وجوود پاکی پېغەمەر
ئەمیری عادل عوممەر کەوت وە پېش
دەسدا وە قەبزەی مەودای درەی وېش
جە لای شانی چەپ ئیمامی عوسمان
ئەعلای زینوورەین جامیعی قورئان
جە پەس هەم ئومېڎ کەڕاڕی حەیدەر
کوشندەی کوففار شەهەنشای عەنتەر
ما باقی یاران شېرانی سەفدەر
گرتەن پەس وە پېش دەورو پېغەمەر
ئەمیری عادل جەنابی فارووق
شای ئیبنی خەتاب سالاری سەرتەوق
پەی پەی جە پېشڕەو خواجەی کائینات
هەر (لا اله الا لله) مەوات
بەو تەمکینی خاس دڵ پەرمیرەوە
پەنجەی بلووریی وە شمشیرەوە
دوورباش مەکەردەن وە ئیستیغناوە
وە ئەندک ئەندک مەشین وە ڕاوە
چوون قوڕەیش دیسان ها ئاما عوممەر
کەوتەن ئەو نەوای پاکی پېغەمەر
بەو تەور تا کە شین وە کەعبەی شەریف
کەردشان تەواف مەرتەبەی زەریف
دیسان هەم چەوسەر بەو نەزمی تازە
بەو تەرز و تەمکین هەر بەو ئەندازە
تەشریفی حەزرەت شای خەیرەلئەنام
نە تۊی تەوقی پاک سەحابەی کیرام
جە کەعبەتوڵڵا موراجەعەت کەرد
قدووم وە مەنزڵ موقەددەس ئاوەرد
موشریکان جە داخ عوممەر بین ماتەم
یەکسەر پېچ وەردەن چوون ماری ئەرقەم
شېویا ئایین وەرعی زەمانە
مەغشووش بی بازار بت و بتخانە.[1]