باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و حەفتا و دوەمە
حەزرەت دیسان تەشریفی موبارەکش پەی (مەروە و سەفا) ی بەردەوە، چاگە دیسان نیداش کەردەوە پەی خەڵکی: (خوڎا یەکێوەن، خالقو مەخلووقاتین، ئیمان باوەردې) .
جە ناگا ئەبوجەهلی کافر ئاما، پېخامئاوەرش سەنگ واران کەرد، لاشەی موبارەکش گوڵگونین بی، بە پەلە وېش یاونا ئۆ کەش و کۊ، چاگە بېئېختیار کۆت:
حەزرەت وەی گرڎ دەرد، وەی جەور و جەفا
دیسان تەشریف بەرد وە مەروە و سەفا
سێ جار نیدا کەرد وە ئاوازی نەرم
وە قەومی قوڕەیش تایفەی بې شەرم
فەرما: تا سەریح بواچوون پېتان
من پېغەمەرم مەعلووم بۊ لېتان
بەبې مەعرەکە، بەبې داداران
ئیمان بە خوڎا و بە من باوەران
مەعبوود یەکێوەن تەنهاو لا مەکان
زاتی بې زەواڵ جانی وە جان ستان
خالق هەر ئەوەن ئېمە گرڎ مەخلووق
عالەم گرڎ مەشۊ تیپ تیپ و جوق جوق
مەخلووق گرڎ فانی مەبۊ وە تاقی
خالق هەر وېشەن مەمانۊ باقی
سێ جار نیدا کەرد، نە ئەی خەلایق
بەرکەرڎەن جە دین ئەمری نالایق
موشریکان یەکسەر، نیگا مەکەرڎەن
پەیا پەی سوجدەی بتان مەوەردەن
ناگاه ئەبوجەهل مەلعوونی بەڎ ڕەنگ
بې حەیاو بې شەرم، گومڕا دڵ جە سەنگ
دەس بەرد یەک سەنگێ هەوادا بە قار
دا وە پېشانی موستەفای موختار
خوون ئالوو کەردش جەبهەی مونەوەر
هوونین بیی ڕوخسار پاکی پېغەمەر
شەندەن وە حەزرەت شای فریشتە خۊ
گوریزا جە تاو، ڕوو نییا وە کۊ
جە دەسی قوڕەیش قەبیلەی بې دین
وەبې ئیختیار کەوت ئەو ڕووی زەمین.[1]