باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و هەشتا و پەنجەمە
تایفەو بەنی هاشمی وېشا ئاماڎەکەرد پەی جەنگی، پەی پارېزنای پېخامئاوەری، دمای هەڕەشەکانو ئەهلو کوفری:
هەم ئەبو تالیب نادم بیی وە دڵ
خەیلێ جەی حەدیس دیققەت کەرد حاسڵ
باز بە دەلالەت مەعزەرەت وانا
جە سەدری مەجلیس حەزرەت نەشانا
وات: فەرزەند بە خوڎا، تۊم مەنزوورەنی
بە هەر موهیمی کە ماموورەنی
سابت قەدەم بەر هەنی جەی کارە
تەبلیغی دینت، مەحکەم بدارە
تا من زیندەبام خەوف مەکەر جە کەس
دشمەن نمەبۊ کەس جە تۊ دەسڕەس
مەشغووڵ بەر دایېم چەنی ئەمری وېت
تا (یوم الممات) سەرم هانە ڕېت
حەزرەت ئیتمینان جە ئەوحاسڵ کەرد
پەنا بەرد بە زات تاک تەنیای فەرد
دەسکەرد وە تەبلیغ حوکمی ڕیسالەت
کوففار هەم وە دینی ئیسلام کەرد دەعوەت
موشریکان دیسان پەرێ پېغەمەر
ئەبو تالیب وېش کەردەن وە ئەسپەر
کۊتاییش نېیەن جە ڕیعایەتش
دایېم مەشغووڵەن جە حیمایەتش
ئەهلی کوفر و قین گرووی شەقاوەت
سازان هەم جە نۊ بینای عەداوەت
تا جە ڕووی ئەفلاک بمانۊ نەجم
دوشمەن بان چەنی گرد بەنی هاشم
پارە پارە کەن مەرکەب و ڕاکیب
خوسووس نەبیرەی عەبدولموتەلیب
سەوگەند وە (هوبەل) ئەعزەم وەردشان
پەی قەتڵی حەزرەت ئیقرار کەردشان
عەهدنامە نویساشان یەکسەر
پەرێ عەداوەت قەومی پېغەمەر
چل کەس سەنادید ڕوئەسای قوڕەیش
جادارانی دەور کەدخودای قوڕەیش
موهری وەسیقە قاتع کەردشان
دەرسات وە کەعبە تەشریف بەردشان
تا ئەبوتالیب زانای ئەی خەبەر
بەنی هاشمش تەڵەب کەرد یەکسەر
جە سەقفی کونبەد بارەگای حەرەم
پەی ڕۊژگاران کەردشان مەحکەم
بەنی موتەلیب دەردەم گرد یاوا
گرد سەر وە یاگە پای حەزرەت ساوا
تا جەمعیەتشان فەراهەم ئاوەرد
حەزرەت با سەحاب وە تۊی شەعب بەرد
بەنی موتەلیب هاشمی یەکسەر
جە موسڵمانان جە گرووی کافر
سیوای ئەبولەهەب ناما چەنیشان
گرد بە ذیتیفاق تایفەی تایفەی وېشان
گرد پەرێ حەزرەت وە جان فشاری
کەمەر بەستشان پەی خزمەتکاری
جەو تەرەف موشریک قەبیلەی غەددار
قەومی تیرەدڵ، کینەجۊی ئەشرار
قەراردان یەکسەر کەدخوداشان هەم
یەک دەفعە چەنی نەبیرەی هاشم
نە مواسەلەت نە موناکەهەت
نە موبایەعەت نە موحافەزەت
نەکەران هەنی تا (یوم المحشر)
بکۊشان پەرێ قەتڵی پېغەمەر
جە نۊ دەسکەردەن وە هەرزە بازیی
وە تەعن وە جیدال وە تیرئەندازیی
ئەبوتالیب خەوف نە دڵ ئاوەردش
قاپی ئەو شەعب ئیستیوار کەردش
ئەر ئەسحابەیی مەشیی وە بەیروون
ئازارش مەدان وە بۍ چەند و چوون
عەرسەی سەرزەمین تەنگ کەردەن لېشان
ڕای کووچە و بازار یەکسەر بڕیشان
زومرەی ئەهلی بەیت سەحابەی کیرام
مەحبووسە و مەخموون سەحەر تا وەشام
تاڵ بیی زیندەگیی ئەوقاتشان
قەتع بی خرید ماکوولاتشان
شەمعی شادیشان یەکسەر بیی خامۊش
بڕیا جە لاشان پای ئەرزانی فرۊش.[1]