تووتە و ڕەقیب
نویستەی: ئەسعەد ڕەشید
(سەگ) پېشەش مەدەی ، وەفاش پی تەورەن
( ڕەقیب) گەنجش دەی ، پیشەش هەر جەورەن
مەجنون چن وەختۍ دېوانەو وېڵ ، تەی
کەرۍ ساراو دۊڵ ، مەنزڵ وە مەنزڵ ، بېیابان گېڵ پەی لەیلۍ دڵوازېش . ڕوێشا عەزمش کەرد و لوا پەی هەوارو لەیلۍ ، چی وەختەیچەنە یانەو تاتەو لەیلۍ بە مەڵامەت و ئاردەیۆ حەیای تکیێشا و دورکۆتەیۆ جە واچە واچو خەڵکی هەوارشا فاڕابۍ و بارشا کەردەبۍ.
مەجنون وەختێ یاوا نزیک و هەوارو لەیلۍ دیش خېڵو لەیلۍ جاشا فاڕان و کەسش چەنە نەمەنەن .
دیش خېڵی لەیلۍ ئەوجا هۊرکەندەن
مەنزڵ وېرانەن کەس تېش نەمەندەن
هەرچاگە مەجنون ماڵاش سەرەشەرەو نا ئۊمېڎ بی . سەرنجەشدا دیوارێ کە دەسچن و لەیلېن لوا پاڵشدا پۆوە و نیشتەرە.
دیوارێو دەسچن لەیلۍ نازاربۍ
سایەش شیفای دەرد قەیسی بیماربۍ
شی نەپای دیوار مەجنونی دڵ ڕېش
تا سای ئەو کەرۊ زامانش ساڕېژ .
پاسەبان و یانەو لەیلۍ ( توتەکەش) هەرچاگە مەنەبۍ جیاو حاڵ و وەزعێ فرە خراپەنەبۍ ، ئاورا ، زامدار کە چن شەوېن چەمش بە نانێ نەکەوتەن .
غەیر جە قورسی ( بەدر ) مانگی دوو هەفتە
هەرگیز چەم بە شکڵ نانێ نەکەفتە
مەجنون ڕووەش کەردەنە ئەو توتەی و ماچۊ :
جە کۊچی لەیلۍ شای بەینەت داران
تۊنی جا مەندەی کۊنە هەواران
خەیلۍ پی دەستور پەشېوبی پەرېش
ئەحواڵی لەیلۍ خەبەر پەرسا لېش
مەجنون فرە پەرېشانبۍ پەی حاڵو وەزع و توتەکەی ، وەختێ سەرەش هۊربڕی دیش نەچیرەوانێ جە دورۆ ئاماو ئاسکێ ( ئاهو ) ش کۊشتېنەو نیێنەش سەرو شانێشۆ . مەجنون هەرپېسە سواڵکەری لوا وەردەم و صەیادەکەی و داواش وەنە کەرد ئاسکەکێش ڎۊ پەنە .
شی وەلای (صەیاد) قەیسی جەفا کېش
تا چوون سائېلان گۊشت بوازۊ لېش
واتش ئەی صەیاد تۊ عەشقی پیرت
ببەخشە پېمان ئارۊ نەچیرت
نەچیرەوانیچ پیایانەو مەردانە نەچیرەکەش بەخشا بە مەجنونی .
صەیاد چوون مەردان مەردانەگی کەرد
لاشەی نەچیرش بە مەجنون سۊپەرد .
. ئیتر کەوت ویرو ئانەی کە گۊشتەکەی توا توا کەرۊ و گردی پېکنۊوە سېخەرەو بە ئاوۆ چەماش نمەکاوەش کەرۊ پەی قوت و توتەکەی .
کەبابێ کەردش بە سەڎ سۊزو خەم
نمەکاوەش کەرد بە ئەسرینی چەم
دمای تېر واردەی ، تۊتەکە کەوت جانبازی و دیسان گېڵاوە پەی لاو خېڵ و لەیلۍ .
دیسان جە نۊوە شی وەلای لەیلۍ
وېش وست نە دامان خاکی پای لەیلۍ
شەو پاسەبانی یانەی لەیل مەکەرد
ڕۊ چەنی شوان مەگېڵا نە هەرد
ئیتر چاو دمای هەر وەختێو قەیس ( مەجنون) عەزمو سەردای لەیلېش کەردێ بە دەلیلی توتەکەی یاوۍ لاو لەیلۍ بەبۍ ئانەی ناحەز هەسش پەنەکەرۊ .
چەو دما هەروەخت ( قەیس) بېش ئارەزو
تا دیدەن کەرۊ ، لەیلی عەنبەربۊ
سەگ پېش مەزانا چوون ساحېب فامان
مەشی وە پېشواز مەگرتش دامان
بەو تەور کە ئەغیار پەنەش نەزانا
مەجنونش وە لای ( لەیل ) مەرەسانا
گەر نا حەزی پەنە زانێ کارەکەش مەیسەر نەبۍ .
ئەر پېش مەزانا ، ڕەقیبی ڕا چەفت
ئاخر وە لای ( لەیل ) کەی ڕاگەش مەکەفت
بەڵام (صەیدی ) وەفاو ( توتەی) فرە بە گۆرەتەرە مزانۊ جە وەفاو ( ناحەزی) و بەڎکاری .
صەیدی داد جە دەس بەڎخۊیی ڕەقیب
نمازۊ دیدار یارش بۊ نەسیب
ئەر سەڎ ساڵ چەنیش بکەری خاسی
خاسیش هیچ نییەن غەیر جە ناڕاسی
( سەگ ) پېشەش مەدەی وەفاش پی تەورەن
( ڕەقیب ) گەنجش دەی پیشەش هەر جەورەن .
[1]