باخچێوە بېگەرد
نویستەی: میرزا ئۆلقاڎرو پاوەی
بەشۊ سەڎ و نەوەڎ و هەشتەمۍ
حەزرەت کە زاناش مامۊش (ئەبوتالیب) ئینا سەرەمەرگەنە، تەشریفش بەرد پەی یانەیشان، پاڵوو سەرەیشەنە نیشتەرە، داواش کەرد وەنە کە ئیمان بارۊن، بەڵام ئەبوتالیب بە چن مەڵامەتێ بە دەم ئیمانش نارد، چەنی ئانەی ماچۊ: من دینو تۊ بە ڕاس مزانوو.
حەزرەت پەی عەمووش کېشا ئاهی سەرد
وە شۊنی قاسید دەردەم تەشریف بەرد
دیش ئەبوتالیب خەیلێ ماتەمەن
قەومی قوڕەیش گرد، جەرگشان جەمەن
حەزرەت فەرماوا: قەومی کینەوەر
یەکسەر جەی سەرا گرد بشن وە بەر
تا من وەعەموم لاڎێ وە یەک دەم
گەردن ئازاڎیی بوازین جە هەم
یەکسەر واتشان: دڵ وە ئەندېشەن
هەرچن بە تۊ قەوم، بە ئېمەیچ خوېشەن
ئەبوتالیب ڕای فەوتش ها نە پېش
جایز نییەن کەس غایېب ببۊ لېش
جەودما حەزرەت جۊش مەدا ئەندۊش
تەشریف بەرد وە لای بالینی مامۊش
فەرما ئەی عەممو: هۊشی وېت جەمکەر
خوڎاوەند جەزای خەیرت دۊ جە سەر
سیلەی ڕەحمییەت وەجا ئاوەردی
من وە تفوولی حیمایەت کەردی
کەردی تەرکی زەوق نۊش و عەیش پەی من
وېیەردی جە قەوم جە قوڕەیش پەی من
ئیسە شەرم مەکەر جە بەرو بیمە
من خاتر شاڎ کەر، وە یەک کەلیمە
ئەبوتالیب وات: هۊشم سەرسامەن
بواچە پېم ئەو کەلیمەی کامەن
حەزرەت کەلیمەی تەییبەی شەهادەت
ئاوەرد، وە زبانی سافی سەعادەت
ئەبوتالیب وات: جەی سەر وەقتەدا
جەی غەرغەرەی مەرگ دەردی سەختەدا
ڕاسش هەر ئېدەن مەکرووهەن جە لام
داخڵ بوون ئارۊ بە دینی ئیسلام
یەقین مەزانوو نیک خوڎای من و تۊ
جای ڕەجا و کەرەم پەنای من و تۊ
وەرنە ئیمانم بە خوڎا ماوەرد
دینی تازەی تۊم ئیختیار مەکەرد
قەبیلەی قوڕەیش خوېش و بېگانە
مەدەران هەزار سەرکۊنە و تانە
ماچان جە سیححەت ئیتاعەش نەکەرد
ها جە خەوفی مەرگ ئیمانش ئاوەرد
ئەرچی دەرحیکمەت وەکار مەبەردی
بەندە و ئیسلام دەعوەت مەکەردی
بە خوڎا بۍ ئەمریت هیچ نمەکەردم
فەرموودەی ئەمرت بەجا ماوەردم.[1]