باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و چوارەمە
ئەبوتالیب، دما قسەش ماچۊ: جە تانەو قوڕەیشیەکا تەرسوو، گەر ئیمان بە دینەکەو تۊ باروون، پېخامئاوەر تەشریفش بەردەوە، دمای چن ساتێ، ئیتر مامۊ پېخامئاوەری کۊچی دیمایېنش کەرد.
جە تەعنەی قوڕەیش ئایینی ئیسلام
ئیمان ئاوەردەن مەکرووهەن جە لام
ئېد وات: ناگاه تەبدیل بیی حاڵش
جە دین و دنیا وېران بیی ماڵش
حەزرەت وە دڵگیر قەدەم ڕەنجە کەرد
تەشریف وە مەنزڵ قەسری بەیزا بەرد
چوون ئەبوتالیب وە هەناسەی سەرد
جە دمای حەزرەت فەوری فەوتش کەرد
چەودما عەلی سالاری سەفدەر
دەرلا ئەو خەبەر دا بە پېغەمەر
وات: ئەو ئاخر شەڕ زاڵی عەموی تۊ
گومڕای دڵ جە سەنگ پیری ڕەنجەڕۊ
وەڵگ حەیاتش بادی فەنا بەرد
تۊ بە سڵامەت کوچی ئاخر کەرد
حەزرەت چوون شنەفت خەیلێ بیی مەحزوون
ڕېزانە دیڎەش ئەسری لالەگوون
پەی عەموی خاس گران بیی دەردش
زیاڎ جە عادەت تەئەسسف وەردش
فەرما یا عەلی تۊ جانشینش
بشۊ خاس بکەر غەسل و تەکفینش
جەنابی ئەمیر کەڕاڕی حەیدەر
عەرز کەرد نە خدمەت شای خەیرولبەشەر
وات: ئەبوتالیب بە کوفر مەردەن
کەی غەسل و کەفن کافران کەردەن
حەزرەت وات: دەخڵت نەبۊ وە دینش
بکەر تەدارەک غەسل و تەکفینش
مەپەرسە خەبەر چە پاک و ناپاک
بەرەش وە حورمەت سوپارەش وە خاک
هیچ حەدییس مەکەر هەر تا مەتاوی
تا هەر وەقت وە لای ئېمە مەیاوی.[1]