باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و ششەمە
ئەبوتالیب وەفاتش کەرد، هەر عەینو ساڵۍ (خەدیجە) ، هامسەرەو حەزرەتی جە تەمەنو شەس و پەنج ساڵیەنە وەفاتش کەرد، ئیتر کۊ خەمانی نیشت ملشەرە، دوۍ کەسۍ نزیکۍ، دڵسوزۍ، خەموەرېش جە دەس دێ.
بە قەولی جمهوور عولەمایان گشت
شناسندەی زات ئەهلی زیبا و زشت
چوون ئەبوتالیب جە ساڵی دوهەم
فەوت کەرد جە بەعسەت ڕەسوولی خاتەم
جەو دما حەزرەت شای فریشتە خۊ
کۊبی گرد جە لاش خەم وە بەرزیی کۊ
دیسان هەر ئەو ساڵ خەدیجەی کوبرا
ڕضی الله تعالی عنها
جە ناگاه مەرەز ئەجەل یاوا پېش
بېزار بیی جە گیان زیندەگانی وېش
تەمامی عومرش جە وەیشوومە و دەرد
چوون وەڵگی پایېز تەمام خەزان کەرد
حەزرەت تەشریف بەرد وە لای باڵینش
گۊش دا بە سەدای سەختی ناڵینش
وات: ئەی خەدیجە جە ناوەشیی تۊ
بوی حوزنی مەلال کەراهەت مەیۊ
بەڵام خوڎاوەند بۍ هامتای فەردەن
جە بەهەشت چەنی من کەرەم کەردەن
تو وە عایشە پاکی میهرەبان
سالیسەن مەریەم کناچەی عومران
چوارەم کەلسووم چوون پرشەی نەجم
پەنجەم ئاسیە بنتی موزاحیم
ئارۊ جوبرەئیل خەبەردا بە وېم
هەر پەنج جە بەهەشت عەتا کریان پېم
خەدیجە واتش: سەڎجار موبارەک
جارێ کۊچی من بکەر تەدارەک
جەودەم خەدیجە حاڵش بەڎحاڵ بیی
عومری شەریفش شەست و پەنج سابی
تاکە جە ناگاه بادەی ئەجەل وەرد
ڕوحش پەی ڕەوزەی ڕیزوان تەشریف بەرد
حەزرەت تەدارەک کۊچی حەرەم کەرد
کېشا پەیا پەی هەناسانی سەرد
مەکەردش زاریی وە بۍ مودارا
ئەسرین جە دیڎەی شابازش وارا
نەعشی سەریفەی حەرەم بەردشان
هەر جە کۊی جەیحوون مەدفوون کەردشان
حەزرەت شیی وە تۊیق قەبری پەڕ نوورش
دوعا کەرد پەی ڕۊح پاکی مەغفوورش
نمازی مەییت جەنازەی سەرجەم
بەعزێ هەم ئوسوول فەرز نەبی جەودەم.[1]