باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و شەسس و پەنجەمە
قوڕەیشیەکۍ ئا شەوە بە نیازو پەلاماردای حەزرەتی گرد ئاماڎۍ بېنۍ، ئەبولەهەب ماچۊ کوشتەی پەنهانی خاس نېیەن، مەشۊم چواردەورو یانەکەیش گېرمۍ، نازمۍ بەربشۊن، سەوای وەرچەماو عالەمیۆ کوشمېش. بەڵام حەزرەت خەبەرش دریاپەنە کە هاگاڎارو وېش بۊ، یاگەکېش جیابازۊ، جوبرەئیل بە حەزرەتیش فەرماوا: پەی موددەو دوۍ ڕوا وېت پەنهانی کەرە، دماتەر کۊچکەرە پەی مەدینەی.
ئەبولەهوب وات: جە دەس بەرشییەن
ئېشەو قەتڵی ئەو فائېڎەش نېیەن
ئېشەو جەی تەدبیر نەدارۊ خەبەر
بگیرین دەورش تا نەشۊ وە بەر
سەحەر گرد عالەم بادا دیار بۊ
قەتڵی محەمەد با ئاشکار بۊ
وەیتەور ئیتیفاق بەستشان وە هەم
قوڕەیش جە یەکتر کەردەن خاتر جەم
تاکە خوداوەند شای بینا و بەسیر
قەدیری قادر بۍ میسل و نەزیر
جوبرەئیل کیاست وە لای پېغەممەر
واقیعەی قوڕەیش یەکسەر دا خەبەر
ڕوحولئەمین وات: یا خەیرولبەشەر
یا سالاری سەف زەمزەمەی مەحشەر
وەیتەور فەرماوان زاتی بۍ زەواڵ
مەبۊ تۊ ئېشەو بەربشیی وە ماڵ
هەرتا یەک دوو ڕوژ پەی وەقعی گومان
نە جایی خەڵوەت وېت بکەی پەنهان
جەو دما لابود جەی سەرزەمینە
مەبۊ هیجرەت کەی پەرێ مەدینە
حەزرەت جەی خەبەر ساتێ بیی سەرسام
وانا حەمدی زات دانای لا یەنام.[1]