باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و حەفتا و هەشتەمە
قوڕەیشیەکۍ بە گۊشو (ئەبوگورز) یشا نەکەرد، گېڵێوە پەی مەککەی، چەودما کابرێوە بە نامۍ (عەبدوڵڵا بن ئەربووت) یاوا بە خزمەتو محەمەدی و ئەبوبەکری، هەواڵو شارو مەککەیش پەی ئاردۍ، ئیتر ڕۊنە گېڵېوە پەی مەککەی و شەوېنە واردە ئارۍ پەیشان.
قەولی (ئەبوگورز) قبووڵ نەکەردەن
هیچکام وە تۊی غار قەدەم نەوەردەن
بەعد قیل و قال وە چن مەعرەکە
قەوم هەم ڕوو نېیان یەکسەر پەی مەککە
چەودما حەزرەت پاکی پېغەممەر
دوعای خێرش کەرد پەرێ کەبووتەر
فەرما عەنکەبووت بەسەزوانەن
یەقین گرد لەشکەر شای لامەکانەن
نەهی کەرد ئوممەت جە کوشتەی ئەوان
کەس دەسی ئازار نەیاونا پېشان
جەودەم عەبدوڵڵا بن ئەربوت یاوا
سەر و چەم و خاک پای حەزرەت ساوا
ئیخباری قوڕەیش ئاوەرد وە لاشان
بوسە دا وە گەرد نەعلەینی پاشان
گەردش و عادەت ئەو مەردی نامدار
ڕۊ مەشیی وە شار شەو ماما وە غار
هەر ئەو میقداری جە یانەی وېشان
دایېم نان و شیر ماوەر پەرێشان
غەرەز تا سێ شەو شای بوراق سوار
چەنی بووبەکر مەندەن نە تۊی غار
جەودما عامر بی بە واسیتە
چەنی عەبدوڵڵا ئیبنی ڕابیتە
بە ئوجرەت گرتەن هەردووشان بەوتەور
وشتران بەردەن دەربی غاری سەور.[1]