باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و نەوەڎ و دوەمە
حەزرەت ڕوەش کەردە (بریدە) و پەنەش فەرماوا: تۊ یانەت ئینا مەککە، وەرو ئانەی گېڵۆ پەی مەککەی، ئارام بگېرە، تاکە هیجرەتت ناتەمام نەبۊ، ئیتر حەزرەت بە سوپێوە ڕەنگینە ڕووش نېیا بە شارو مەدینەی، تاریخو کۊچەکەیش دواڼزەو ڕەبیعەلئەوەلی، خەڵکو مەدینەی بە ژەن و پیاوە پەی پېشوازیشان ئامێ وە سارا،
من هەم جە ڕیکاب شای گەردوون ئەفسەر
عازمم تا موڵک مەدینەی ئەنوەر
حەزرەت فەرماوا: جە مەککەن ماڵت
هەم بشۊ وە لای بەچە و عەیاڵت
تاکە ئەو موشریک عەدووی بۍ دینە
نەزانان تۊ هەم بۊ پەی مەدینە
مەبۊ ئارامت سوبح و شام نەبۊ
تاکە هیجرەتت ناتەمام نەبۊ
خواجەی کائینات و سیدیقی ئەکبەر
جامەی نەو سفید پۊشاشان نە وەر
بریدە کېشا بەیداخی شاهیی
مەلایەک جەم بین جە مەە تا ماهیی
حەزرەت وەی ئەسحاب سوپای ڕەنگینە
ڕوو نېیا وە ڕووی موڵکی مەدینە
دووشەنبەی غوڕڕە (ربیع الاول)
واقیع بی ئەی کار بۍ سەهو و خەلەل
بە قەولی ڕاویی ڕەوزەتولئەحباب
مەرقوومش کەردەن وەیتەور جە کېتاب
ئەهلی مەدینە شنەفتەن خەبەر
حەزرەت جە مەککە بەرشیەن وە بەر
عەزمی سکوونەت مەدینە دارۊ
مەبۊ وارید بۊ سەباح یا ئارۊ
جە قەومی قوڕەیش خەیلێ دڵ سەردەن
ئەسیح تەشریفش حەرەکەت کەردەن
زکور و ئوناس دارا و نەدارا
پەرێ ئیستیقبال مامان وە سارا
هەریەک مەشیی وە سایەی سەنگێ
ئینتیزار مەبیی تاکە درەنگێ.[1]