باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و یەکەمە
میرزا ئۆلقاڎرو پاوەی ئەچی بەشەنە، باس جە قومیای چن کارەساتێ کەرۊن، باس جە وەفاتو چن ئەسحابێ، ئیشارەت مڎۊ بە جەنگو سەفینی مېیانو مەعاویەی و مورتەزا عەلینە، باس چا وەختەیە کەرۊن هەکە دمای ئانەی مزگی حەزرەتی جە شارو مەدینەی بنیاڎنریا، حەزرەت زەید کوڕو حاریسەی، چەنی چن کەسێش کیاستۍ پەی مەککەی، بە نیازو ئاردەی کناوچە و ژەنەکەیش پەی شارو مەدینەی.
جەو دما عەممار عەلەمداری دین
هەر مەند تاکە حەرب مەعرەکەی سەفین
چوون مەعاویە و مورتەزا عەلی
دوشمن بین وە هەم خەفیی تا جەلیی
جە سەحرای سەفین یەک، حەرب سازان
تاواشان وە هەم ئەهلی دادخوازان
چن سەحابەی پاک جە سانی ئەوسەف
شەهید بیی یەکسەر جە هەردوو تەرەف
عەممار هەم شەربەت شەهادەت نۊشا
جامەی مللەی نوور بەهەشتی پۊشا
بەڵ هەر ئەو ساڵە هەر وەی قەوارە
وەفات کەرد ئەسعەد ئیبنی؟زەرارە
ئەهلی یەهوودی چوون لېژ بی جاشان
هەردەم وە نەوعێ تانە مەداشان
واتەن: محەمەد ئەگەر ڕەهبەرەن
ئەر جە لای خودا ئەو پېغەممەرەن
مەشیا نەکەرداش قبووڵ ئەمری مەوت
ئیبنی زەرارە هەرگیز نەبۊ فەوت
با وجوود ئاخوون کونە گەماڵان
حاڵی بیی جە قاڵ قەدیم مەقاڵان
داود یا سلیمان مووسا یا هاروون
جە دەستی ئەجەل گرد بیی سەرنگوون
حەقق وېش فەرماوان عالەم مەبۊ فەوت
وکل نفس ذائقە الموت
بەڵ هەر ئەوسات خواجەی کائینات
سالاری مەحشەر شای ئەعلا سیفات
زەید بەنی حاریس تەڵەب کەرد وە پېش
فەرما ئەی ڕەفیق دوسی مەینەت کېش
کاری من بە تۊ مەبۊ فەراهەم
مەبۊ بشیی پەی مەککەی موکەڕڕەم
کڵفەتی بەنات بەرکەری جەوخاک
خوسووسەن سودەی موحتەرەمەی پاک
هەم ئەبو ڕافع ببەر چەنی وېت
ئاگابەر قوڕەیش ئازار نەدان پېت
دیسان قەراردان عەبدوڵڵای سەروەر
ئیبنی ئەبووبەکر سیدیقی ئەکبەر
ئەو شەو وە تەوفیق زاتی ئیلاهیی
هەرسێ وە نیاز مەککە بین ڕاهیی
ئەوەڵجار تەواف کەعبە کەردشان
جەو دما وەشار تەشریف بەردشان
عەبدوڵڵا سروو کەرد وە یانەی پدەر
ئەوان شین وە ماڵ ئاوای پېغەممەر
بەناتی حەزرەت پایەی ڕەفیعە
سودەی موحتەرەم بنتی ڕەبیعە
هۊرگرتەن تەمام کڵفەت و عەیاڵ
بەرشین جە مەککە بە فەرد ئیقباڵ.[1]