باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و ویس و دوەمە
سەلمانی فارسی، وەختێ ئاتەشخانەنە زیارە، ڕانە یاوا بە کڵېسایێ، وەختێ نزدیک بییۆ، گۊشش دا بە وانای ئینجیلی، کە قەشەکۍ وانېنېش، دەنگشا فرە وەش بۍ، کارشکەرد سەلمانی، پەرسێش وەنە: ئینە چ دینێوەن؟ واتشان دینو عیسایەن، هەر کەسېۋ وەی دینە ئاشنا مەبۊن، نزدیک مەبۊن جە خوڎایۆ. سەلمان دڵو وېشەنە واتش: ئی دینە جە دینو ئاتەشپەرەسی خاستەرەن، پەیا پەی دینو مەجووسیش جە دڵ بەرکەرد.
سەلمان ئاخېز کەرد وە بۍ مدارا
چوون وەحشی سەرسام ڕووکەرد وە سارا
جە ناگاە ڕاش کەفت وە کڵېسایێ
کڵېسای قەدیم شیرین دارایێ
ڕەهبانان بەعزێ ناقووس شەندەن
بەعزێ هەر ئینجیل عیسا مەوەندەن
سەلمان سەرسام بیی جە ئاینشان
جە شغل و تاعەت وەزعی دینشان
حەیران بیی جە دەنگ ئینجیل واناشان
خولاسە کەم کەم تاشیی وە لاشان
وات: بە ڕاهیب یە چ دینێوەن
عەجەب دەستوور و دڵ گوزینێوەن
ڕاهیب وات: بەڵۍ یە دینی عیسان
هەرکېشی قەدیم تەرسای کڵېسان
هەر کەسېۋ وەی دین ئاشنا مەبۊ
بۍ گومان نزدیک نە خودا مەبۊ
سەلمان نە دڵدا وات: پیری مەستی
ئېد خاسەن جە دین ئاتەشپەرەستی
دیسان هەم پەرسا جە ڕاهیب خەبەر
واتش: ئەی نیعمەت چکۊ بېیەن فېشتەر
ڕاهیب وات: فېشتەر ها جە شام
تەرسا مەزهەبەن تەمام خاس وعام
سەلمان پەیا پەی کېشا ئاهی سەرد
دینی مەجووسی نە دڵدا کەم کەرد.[1]