قاڎرو لېفە شڕەکەش
بەشۍ یەکەمە

میرزا ئۆلقاڎرو پاوەی، دیارەن ژیوایێ فرە زەحمەتبارو ناڕەحەت ژیوان، ئاڎ وەختێ باس جە لېفە شڕەکەیش کەرۊن ئەپا حاڵەشۆ، ئینسان موچڕکی مەیان گیانشەرە، شاعېرێ، مەڵڵێوە، زانێوە، واچەسازێ پېسە میرزا ئۆلقاڎری کە ساڎەتەرین هۊکارو ژیوایش کە لېفەکەشەن، شڕەن، دەساو دەسەن، نە تانش مەندەن، نە پۊ، یاگەی کەک و مورانەن، مانیاو دەسو ڕوژگاریەن، بېزار جە وېش، ئیتر میرزا ئۆلقاڎر هەم بە خاترەو وېش، هەم پەی خاترەو لېفەکەیش، کە داواش وەنەکەرۊن وازش چەنەبارۊن و ئازادش کەرۊن، پەنا مەبەرۊن ئەو لاو دەسەڵاتدارێ جە شارو پاوەی، کە بەشکم چارێش کەرۊن.
ئاغە دەردی دڵ بۍ نەهایەتەن
حیکایەت نېیەن، یە شیکایەتەن
تۊ حەکیم حاڵ من ساحیب دەردم
گۊش و هۊش و دڵ بدەر وە فەردم
جە ماڵی دنیا لەحافی داروون
دایېم زیندەگی وە ئه و مەویاروون
لەحاف کام لەحاف، جای حەسیر بافان
کۊنەی کوڵ عەدەم پەند لەحافان
نیشانەی نیگبەت مەنزڵگەی ئیدبار
جای کیچ و مەگەس لانەی موور و مار
تەوق لەعنەت تەرز ناپەسەندیدە
باڵاپۊش جن شەیتان خەندیدە
ڕیزە ڕیزەن و شڕۊڵ و فەرتوت
تەنکتەرەن جە تای تار عەنکەبووت
سەربار مەینەت یاگەی بەڵا و دەرد
سەردتەر جە هەوای ئېڵاخان سەرد
نە تانش مەندەن نە پۊش دیارەن
ئازای ئەڼامش فەتار فەتارەن
هەرکەسێ یەک شەو، بدڎۊش بە‌ وېدا
تا ڕۊی قیامەت، هەر ها نە جېدا
بدڎان وە جەرگت حەربەی خارا بڕ
وەشتەرەن جە خاو خوفتەی لېفە شڕ
بەڵی ئاغەکەم دانای سوخەن سەنج
کان کۊی گەوهەر مەعدەن سەرای گەنج
ئەر پەرسی جە کۊ؟ پەی کۍ ۋرازیان؟
ئەسڵ بنیادش پەی کۍ سازیان؟
ئەوڕۊ کە ئادڎەم شای (ئەبولبەشەر)
ئاما بە وجوود نە عەرسەی خەتەر
وە ئەمر بېچوون پادشای مەعبود
نە پاڵوی چەپش حەوا بی مەوجود
جە دمای حیلەی ئیبلیسی بەدکار
گەنم داوە خورد حەوای مەینەت‌ بار.[1]