شنۊی سەحەر خېز
بەشۍ چوارەمە
میرزا ئۆلقاڎر، درېژە مڎۊ بە مۊچیاریکەردەی شەماڵی، ماچۊ: ئا یاگۍ کە پەنەم ئەشناسای گرد دڵگیرېنۍ، بەڵام ئاگات چەنەبۊ، سەردای پاوەشاری فەرزەن، ئیلاو ئۆلاش نییەن چەنە، مەشۊم (هەوڵی) کە کەوسەرو سەرزەمینیەن، یاگۍ نازارانەن، هەم شاروو (پاوەی) جە ۋیر نەکەری، چونکم یاگۍ قیبلېمەنە، ئینە نامونیشانېش بان، لووە خزمەتش، هەواڵش پەی من بارە.
لاڎێ قەترە دەر تەیکەر (لارەکاو)
تەشریف بەر وە سەیر چەمەی (هانەساو)
تووخوڎا نیگاکەر چە خاس دڵگیرەن
چاگە ویەردی شەماڵ (ویمیرەن)
جە (ویمیر) بەر شیت (هەوڵی) سەرئاوان
سەرمایەی سیحەت حەیات (پاوە)ن
دایېم ئارامگای جەرگەی یارانەن
جای عەیش و نیشات چەم‌خومارانەن
نازک خەیاڵان پاسەشان واتەن
(هەوڵی) کەوسەری ڕووی سەربەساتەن
ئەوسا ڕوو بنیە وە ڕووی (پاوە)شار
شەماڵ ئاڎ فەرزەن یە گشت بەرکەنار
چاگە ساکن بەر ئەمجار وەڕاسی
مەبۊ تۊ قیبلەم چە تەور بشناسی
جەودما ماوەر عوزر و بەهانە
ئیسمش وە شەش حەرف نەی فەردەوانە
پەری دەستوورەن مەلائیک زادەن
ساحیب سپا و سان تەمام ئامادەن
عەقرەبان سەف‌سەف چنووران چین‌چین
کەردەن وە پەرچین دایەرەی جەمین
گیسو چوون کەمەند قەترانی زەنگی
چوون حەڵقەی ئەرقەم ئەژدەهای جەنگی
سەر ها وە سەروین بەغدا شارەوە
پېشانی به و سەیف هندی کارەوە
دووعەین مەخموور ڕشتەی ئیلاهیی
هۊرچەرخنای عەین شاباز شاهیی
گۊناش گوڵ ئەحمەد نامانش نە خەو
مەگەر ۋرشەی لاڵ باڵ کەیخەسرەو
لەب دورج یا قووت بینی ئەلف کېش
موژان چوون ئەڵماس ژار ئالووی پەڕ ئېش
دەم غونچەی نازک وەش بۊن چوون عەبیر
زەنەخ تۊپ زەرد هۊرکەندەی کشمیر
گەردەن چوون بلوور ئایینەی بېگەرد
چاڵ تینی ساف قەترەی (ماءالوَرد)
سینە سینە بەت لاچین ئاوان
یا پەڕ قووی نازک گۊشەی شەتاوان
گەردەن نیم گرە سوراحی چینی
مەر نەلای فەغفور وەی تەور بوینی
جە (صنع) قودرەت لاشەریک فەرد
بەندەن جە سینەش جفتێ لیموەی زەرد
به و ڕەنگ ناپەیدان ئاخر تا قەدیم
مەر نارنج باغ (جنات‌النعیم)
ناف ناف ئاهوی خەتا خۊ کەردە
داخ نە تۊی دەروون سەد سەیاڎ بەردە
ڕەجڵەین شوشەی دوڕ تەڵای تازەقاڵ
پەڕ جە مروارید پاوەن وە خڕخاڵ
کەنج سەر بە مۆر بەستەی رۊزگار
نەسیم کۊی قاف مەخفی و نادیار
ڕەفتش بینای عالەم کەردەن لیڵ
مەر جە لای جەیران سارای خوتەن گېڵ
باڵاش خەجاڵەت دان وە نەیشەکەر
خورما حەسرەت‌مەند داخ دارەن عەر‌عەر
تازە بەر ئامان جە خەڵوەت‌خانە
شەماڵ نیگاکەر سا بۊ بمانە
بڎیە ئەر خورشید کەم کەرد شۊڵەی خۋەر
ئانە ئېدڎ نە برج بەرئامان وە بەر
دەخیل نەگنۊت سەر هەوای سەرکەشان
ئه و نام ئه و نیشان جە یادت نەشان.
[1]