سېوەنگ... پېوەز

سېوەنگ بە ماناو سیاوی هەم پېوەزی مێ، زیاتەر پەی ئەبرۊی یام برۊی سیاو ڕەنگی مێ کە بە کەسێ ماچان چەمو برۊش سېوەنگەن، یانی برۋېش سیاو پەڕېنۍ و دانشاوە یۊی.
واچۍ سېوەنگی جە پارچە شېعرێنە مەولەوی واتېنە، شېعرەکۍ پېوەڼییش هەن بە داواکەردەی زەڕی و یارمەتیۆ.
شېخ عەزیزی جانەوەری هامڕاو مەولەوی بېیەن جە سەردەمو وانای حوجرەو فەقییەتینە، داوا جە مەولەوی کەرۊن کە بڕێ زەڕش پەی بکیانۊ پېسە مانگانەی.
ئەچا سەردەمەنە، سەردەمو دنیاو مەعنەویەتی و زاڵ بېیەی بەها بەرزە ئینسانیەکان، سەردەمو ڕەفیقی و پېوەڼییە بەرزەکان.
بزانە مەولەوی چەنی جوابش مڎۊوە، بە چ گیانێ بەرزو عاشقانەو ڕەفېقانە؟
مەولەوی شېخ عەزیزی وېنا کەرۊن بە مانگەی جوانە، پەیش منویسۊ: ئەی ڕەفېق، مادام تۊ پېسەنی مانگۍ یانی هەقەن مانگانەت پەنە دریۊ!
بەڵام تۊ کە داواو مانگانەی کەری جە من، من جە دووری تۊ هۊشم نەمەنەن و ئاگام جە حسابو مانگۍ نېیەن، هەڵای مانگەی تازەو نۊم نەدیەن بە چەم تا وەختو مانگانەکەیت (مەعاش) ئامابۊ. هەرگا دیم ئەبرۊی سېوەنگت، ئیتر زانام مانگە نۊ بېیېنۆ و یانی سەرو مانگېن، ئاوەختە مانگانەکەت مڎەو پەنە، یانی ئا وەختە کە مەگېڵیۆ پەی لایم.
ئەی مەولەوی زەڕش هەن بەخشۊش؟ نەخێر
قابیلەن زاتێوە پېسە مەولەوی مەنۊرە. ئاڎ هەڵسۍ زیوینۍ چەماش جە وەختو شاڎ بېیەیۆش بە ڕەفېقەکەیش، ڕوخساری زەردش کە جە دووریش زەرد بېیەن کە پېسەنە لیرەی ئەشرەفی زەردی، پېشکەشو ڕەفېقیش کەرۊن

دیدەم نەو نەمام نەو توولی ساوا
نامەت پەی خەرجی وەلای من یاوا
ئەمرت دڵگیرەن، فەرموودەت خاسەن
بۍ شک ماهەنی، ماهانەت ڕاسەن
بەڵام جە دووریت هۊشم ڕەم کەردەن
ئاگاهیم نېیەن چەن ڕۊ ویەردەن
هەر ئېد مزانوون ئازیز گیانو تۊ
نەدیەنم وە چەم هەڵای ماە نۊ
شیرین ڕایەتم، خاصەی سەرکارم
بۍ وادە زوڵمەن بدەی ئازارم
هەرگا دیم هیلال ئەو ئەبرۊی سېوەنگ
یە سیم ئەسرین، یە ئەشرەفی ڕەنگ

شېخ عەزیز وەختێ مەگېڵۊوەو شاڎ مەبۊن بە دیڎارو مەولەوی ئەپاسە مەعاش و مانگانە وەرگېرۊن!. [1]