قیبلەم ئامات بیم...

مرزا ئۆلقاڎر، چەمەڕاو ئازیزیەن، بەڵام ئی جارە شانسش هەن، چونکم ئازیزش بە وېنەی بەرقی لامیع بە سەر، تەشریفش ئاوەرد بە دەشت و دەردا، ئیتر وەشیېنە حەیران مەندەن، بەڵام میرزا متاوۊ وەردەمو ڕۊخساری بەرق ئاسایشەنە وېش گېرۊن؟ هەرگیز، ئاڎ گەر ڕۊخسارچش نەبیەبۊ بە زوخاڵ، ئانە حەتمەن دەروونش بېیەن.
قیبلەم ئامات بیم قیبلەم ئامات بیم
ئېشە و ئینتزار وەسڵ ئامات بیم
چوون حەسرەتمەندان چەمەڕای ڕات بیم
ئارەزووی بۊسای تۊزەکەی پات بیم
هۊردابیم پەی سەیر پەنجەرەی مەنزڵ
گرتەبېم پارېز نگای دیده و دڵ
ناگا وېنەی بەرق لامیع جە سەردا
تەشریفت ئاوەرد بەو دەشت و دەردا
بەڵام چېش واچوون ئای چېش ئاما پېم
حەیران بیم جەو دەم جە حاڵات وېم
جە لەقای شەوقت شۊخ سۊسەن خاڵ
بەدتەر جە کوَی توور بیم وە کۊی زووخاڵ
چوونکە چوون شیرین وە شەو دېزەوە
بەو نیگای ئاهووی خوتەن‌ڕېزەوە
بەو شکۊو شەوکەت شاهان خېزەوە
بەو شامار زوڵف عەتر ئامېزەوە
ویەردی جە کۊ پات ئاوەردەوە
کام سۊتەت بەو تەور ئەحیا کەردەوە
هەرچن بېخەبەر جەماڵ من بیت
غافڵ جە ناڵەی ئەحواڵ من بیت
خۆپەی پەی ئەکرام باڵات مەکەردم
سوژدەی پای وېت و ئەسپت مەوەردم
کاڵای گیان پېشکەش باڵات بۊ ئازیز
ماڵ گشت فدای خاڵ ئاڵات بۊ ئازیز
عومرم پایەنداز پای تۊ بۊ ئازیز
دیڎەم ڕای قەدەم ڕای تۊ بۊ ئازیز
قامەت هەر پەی تۊ خەم وەرۊ ئازیز
چەم با هەر پەی تۊ چڵ کەرۊ ئازیز
دڵ با هەر مەحبووس دامت بۊ ئازیز
گۊش با هەر شەیدای نامت بۊ ئازیز
خولاسە ئەو شەو تا وە شەفەق زەرد
بەو هیجران تۊ شەو کەرد و من کەرد
وە مەیلت قەسەم هەی بەرگوزیدەم
خاو گوزەر نەکەرد ئەوشەو نە دیدەم
خاس بی سوب سەحەر ڕەوشەنی ئاوەرد
جە ڕەوشەنی تۊ شەوم وە ڕۊ بەرد
وە بۍ ئەختیار ئامام وە حزوور
نەمەندم تاقەت نیگای دووراو دوور
وەختێ جەو دەمدا وە حزوور یاوام
سەر نەپایەی چەرخ هەفتەمین ساوام
تۊم وە فریشتەی عالەمین وانا
وېم وە پادشای هەفت ئەقلیم زانا
بەڵام پەڕمەیلی زاهیر نەوی لېت
ڕوو نەکەرد نە ڕای غوڵامەکەی وېت
نمەز جە ڕەقیب خۊفت کەردەوە
بەدر جەماڵت وە هەور شەردەوە
چوون تاج شاهان کەچ نەکەلەی سەر
ڕاس نەبۊ چەنی دوڕدانەی گەوهەر
تۊ هەم هەر بەو تەور شش‌دەر لېم بەستی
جە لای من دیدەم وە کەچ نشەستی
هەرچەندی خەیاڵ عارفانەت کەرد
ئەو ڕۊ کەچی تۊ هەر کەچیش ئاوەرد
وەختێ هەم لوای خەفەت دای پېمان
خوڎا حافیزی نەکەردی لېمان
هەر ئەوەند دیام وە شۊنی تۊدا
چەم پەڕبی جە تەم سارا و سەرکۊدا
گەردەنم کەچ کەرد چوون گوناکاران
پووچەن زیندەگی جە دمای یاران
ئەرجوومەن کارت کەچە کار نەبۊ
با هەرگیز خۊفت جە ئەغیار نەبۊ
مەزانوون ئازیز دڵ بی خەلافی
دایېم زاهیرکەچ وە باتن سافی
جە وەفا و کەرەم قسوورت نیەن
ڕموزات عەشق شیوەی تۊ بېیەن
بەڵام من دەردم تەمام کاریەن
(قادرم) مایەی بۍ قەراریەن
یانەی سەبرم سفت تاقەتم تاقەن
مەزاقم مەرگەن مەرگم مەزاقەن
تووخوڎا بەندەی وېت ئەگەر مەنوازیی
یا کوشەش ئامان یا چارە‌سازیی
هەنی نەداروون تەوەنای دووری
کافیەن هیجران دەرد مەهجووری
مەردەن وەشتەرەن دیڎەم جەی دەردە
جەی شەونشینی جەی ئاهی سەردە
مەردەن وە جاری ڕاحەتم پەی وېم
هیجر تۊ هەرسات سەد مەرگەن پەرېم
هەناسەم خۊ لېت نمەبۊ کاری
وە سەوگەند چەنیم باوەڕنەداری
سا ئەجەڵ بۊرێ ئەروام خەلاس کەر
ئامان جەی فېشتەر نیەن دەردیسەر.[1]