خەمو خەفەتو میرزا ئۆلقاڎری ئڼە فرەن، بېیەن بە خڎېش، گرڎ سات و دەمێش هەر خەمەن، دیارەن ڕەفېقێش کە مشکین نامێوەش پەی کیاستەن، ئەحیاش کەردەنۆ، هەر دېڕێش داراو ئاوازێ، هەر فەردێش دەردێش مەکەردەن چارە، نامەو ڕەفېقەکەیش دەواو دەردەکاشەن.
قیبلەم من خڎېم
قیبلەم من خڎېم قیبلەم من خڎېم
جەی وەرتەر خەم بۍ، داېم من خڎېیم
نامەی ڕۊح ئەفزات ناکا یاوا پېم
حاڵم وەشتەر کەرد جە حاڵات وېم
بی سەڎای مەسیح نە تۊی پەردەوە
جە باسەی مەمات ئەحیام کەردەوە
فڎای خامەت بام شای مشکین خامان
هەرگیز تۊ وەی تەور نامەکەت نامان
مەزموون دڵگیر، تەوەن تاوەکەت
نەشئەی دەلالەت دڵ کەواوەکەت
وەختێ جه و دەمدا مولاحیزەم کەرد
تا وانام هانام جە گەردوون ۋیەرد
هەر سەترێ چەترێ سەیوان بەستەبۍ
هەر نەزمێ بەزمێ ئاوات وەستەبۍ
هەر فەردێ دەردێ مەکەردش چارە
هەر حەرفێ تەرفێ مەڎا ئیشارە
هەر سۆزێ تۆزێ دڵ ئاوا مەکەرد
هەر خامێ زامێ مداوا مەکەرد
یەکایەک تەمام فەرەح دا وە جەرگ
سیوای ئاخر فەرد ئەی ئەخلال مەرگ
مەرگ تۊ پەی من قەزات وە دیڎەم
نەواچی هەنی هەی بەرگوزیدەم
سا من چېشم کەرد ئاخر چېشم وەرد
غەیر جە ئاهی سەرد قرچەی ئېش و دەرد
توخوڎا کام سەفام وە دەماخ یاوان
ئاخر تۊ پەی چېش مەگېریم تاوان
کەی من وە خەلاف تەبع تۊم کەردەن
یا کام ئەمر تۊم وەگا ناوەردەن
فەرمابېت وەختەن ببوون دېوانە
جە واتەی ئەغیار سەرکۊنە و تانە
مەعلووم من پەی تۊ جەرگم زوخاڵەن
تۊ هەم پەرۍ من زندەگیت تاڵەن
من پەی دووری تۊ بیناییم کۊرەن
تۊ جە داخ من زامت ناسۊرەن
من پەی تۊ داروون زایەڵە و زاری
تۊ پەی من دایېم مەکېشی خاری
من پەی تۊ تەرک شارانم کەردەن
تۊ پەی من باڎەی مەحروومیت وەردەن
من هەر بەو سەوگەند چەنی تۊ وەردە
بەو میعراج بەرز حەزرەت سەیر کەردە
چەنی تۊم کەردەن وە ئارەزووی دڵ
بازگەشتم نیەن تا سای سەرای گڵ
وەبۍ ڕەزای تۊ نەکەروون کاری
نەپەرسوون هەرگیز جە ڕاویاری
نەنیشو ساتێ وە بۍ یاڎ تۊ
نەنیۆن پا، وەبان ڕوکن ئاباڎ تۊ
بەڵام تۊیچ قوربان شای مەهجەماڵان
ڕەنج بەردەی من، مەدەر وە تاڵان
دایېم نە تەدبیر ۋېت مەکەر غافڵ
با وەس بکېشوون جەفای دەرد دڵ
گۊش مەدەر وە قەوڵ واتەی ئەغیاران
ئەندېشەت نەبۊ جە بەڎ کرداران
هەنی جەی مەدام پەژاران تۊ
گۊش وە بەڎیی ئیڎ، دڵ وە فتنەی ڕۊ
بسازی چەنی چەرخ زەمانە
تا هەنی چەپگەرد نەمانۊش دانە
بەڵکوو کەرەمدار کانی کۊی کەرەم
بیاونۊ وە شاڎ من و تۊ وە هەم
باقی وەسەلام دنیا و دینەکەم
قیبلەگای عەزیز سەرزەمینەکەم
ئەرسەد وە دووریت قامەت خەمیدەم
هەرچی ڕەزای تۊن، وە بان دیدەم.[1]