ئی شېعرۍ میرزا ئۆلڤاڎریە، ئاڼەی دۊڵەمەڼەنە بە گوڵدانو واچا، ئاڼە ماناو مەزموونش قووڵ نېیەن، ئاواتەکۍ میرزای پەی یاوایش بە وەشەویسەکېش، دماتەریچ ئاوېزانو باڵایش، بەڵام پېسە هونەرو بەرۋستەی، میرزا ئۆلقاڎر بە جوانی قافیەو شېعرەکېش ڕازنانۆ بە واچە نەخشینەکا دلۍ واچەدانی دۊڵەمەڼیش. (جەماڵت، خرخاڵت، نۊهاڵت، لاڵت، غەزاڵت، ئاڵت، .......هتد) .
لەبان لاڵت...
لەبان لاڵت لەبان لاڵت
قیبلەم لاڵم پەی لەبان لاڵت
پەی نیم نیگای ناز دیڎەی غەزاڵت
سەرعیم پەی گوڵاو سەرگۊنای ئاڵت
دېوانەم جە داخ زوڵف زوخاڵت
چوون چنوور تاش شنەی شەماڵت
ئەر پەرسی ئەحواڵ قەیس عەبداڵت
شەوان تا وە ڕۊ هام نە خەیاڵت
ئاخ شەوێ ڕەقیب بدا مەجاڵت
چەندێ وە شاڎیی بامام وە ماڵت
بپېچیام وە تۊی باڵای نۊهاڵت
بکەردام تەواف کەعبەی جەماڵت
بېخۊف بنیام سەر وە بانی باڵت
ببۊسام پەی پەی زنج پەڕخاڵت
جەو کەنج مەقمور تەڵای دووقاڵت
دڵ وەش کەر بەندەی خاتر مەلاڵت
بۊ کەم شەمامەی زەرد خاڵ‌خاڵت
نە باغچەی ڕەنگین بەیان کاڵت
بەیۊ نە گۊشم زەنگ زەڵاڵت
دەنگ غەمزە و ناز خڕەی خڕخاڵت
سا پەنا وە بەخت زەڕەی ئیقباڵت
ببۊ وە نەسیب وەسڵ جەماڵت
چوون باقی گونا گشت ماهو ساڵت
با بشۊ نە پشت نامەی ئەعماڵت
یا سەودایی تەر موژەی قەتاڵت
جەرگم پارە کەر هوونم حەراڵت
حەیفەن نەدیەنم دیڎەی غەزاڵت
هاژەی نیم‌خەدەنگ قاژەی پەڕداڵت
قەیست چوون هارووت کەفتەن نە چاڵت
دووساخەن وە زوڵف سیای تاڵ تاڵت
چۊنەن، چەتەورەن، هاڵ و هەواڵت
بکیانە پەرېم نامەی ئەحواڵت
ڕاز کەس نیەن نە گۊشەی شاڵت
وەرنە دەی جە دەس، دامنەی خەیاڵت.
[1]