بنەچەو بەگزاڎەکا هۆرامانی
بەشۊ یاڼزەهەمۍ

خالید سان:
دمای کۊچی دمایینو (بارام سانی دوەمی) ، خالید بەگی کوڕش بېیەن بە سانو هۆرامانو لهۊنی و ڕەزاوی، دەربارەو حوکمڕانی (خالید سانی) ، مەڵڵا عەبدوڵڵای قازی نویستەنش:
ئی سانە یۊ بېیەن جە بە تەواناتەرین و چەنەئاماتەرین سانەکانو هۆرامانی، نامبریا، پیێوە ئایین ئەشناس و ڕوح سووک و مروڤ دوس و زیرەک بییەن، فەسڵو هامنیش جە (کۊ سەردانی) و زمسانش جە (هانەگەرمڵە) گوزەرنان، سەردەمو حوکمڕانو ئی سانەینە، حەیدەر بەگو بەڵخەی؛ کە ژەنبراو مووسا بەگی بییەن، بە نمایەندەو دۆڵەتی جە (نۆسووڎە) نریانەرە، باس چانەیە کەران کە حەیدەر بەگ کەسێ نمەک بە حەرام بییەن، وەراۋەر بە خالید سانی دڵ کرمۍ بییەن، چەنی سڵېمان پاشاو بابانی ڕېککۊتەن سەرو ئانەی بە نامۍ مېمانداریۆ (خالید سانی) چڕا پەی شارەزووری، چاگە زەفەرش پەنەبەران، ئاڎییچ بۍ هاگا جە مەرامو (سڵېمان پاشای) ئامان پەی شارەزووری، دمای ئانەی تاکشا ۋستەن، قۊڵبەس کریان، دمای یەرۍ ڕۋا بە دەسو حەیدەر بەگو بەڵخەی ساڵەو (1170ک/ 1756ز) کوشیان.
دمای کوشیای (خالید سان) ی، پاشاو بابانی فەرمانو حوکمڕانی هۊرامانیش پەی (حەیدەر بەگ) ی نویستەن، حەیدەر بەگ تاکە کەس بېیەن جە تاریخو سانەکا هۆرامانینە جە بنەماڵەو (بەهمەن) ی نەبیەبۊو حوکمڕانی هۆرامانیش کەردەبۊ، دمای شش مانگا جە حوکمڕانیش بە دەسو (محەمەد بەگ براو خالید سانی) دلۍ حەرەمسەراو وېشەنە کوشیان.[1]