واتەو گۊشگېرتەی مېیانو ئاسمانی و زەمینی
بەشۊ حۆتەمۍ
جەنگی سەرد هەم زۊرانبازی سەرد، مېیانو ئاسمانی و زمینینە بەردەوامەن، پېسە مزامۍ ئاسمان پا گردو تەبەقاوە، پا ژمارە بېشومارا جە هەسارا و مانک و ۋەریشۆ، هەرگیز وېش نمارۊرە ئاستو زەمینی، بەڵام چەنی ئانەیج زەمین دەنگش دلېرەن، ئاسمان ئی جارە تەمام تووڕەن، دیارەۋاری پەی زەمینی و بە دەنگێ بەرزی تېکەڵ بە نەعرەتەو گرمەو هۆری ماچۊ: من دایېم ئینانا شاڎیی و زەوقەنە، ساقی و بادەم هەن، دەماخم بەرزەن، پای میعراجم هەن، من بەهەشتم هەن، جۊی سەلسەبیل، هەزارەها حۊرۍ نازارېم هەنۍ، زېوەر و زینەتی ڕەنگاوڕەنگم هەن، پلوورەۋارانۍ ڕەنگاڵېم هەنە، کەیوانی هەفتەمم هەن، بەڵام با بزانو ئەتۊ ئەی زەمینی هاڵی، بېجگە تەۋەنا و خوڵۍ چېشت هەن، مەر تا مەنەنی هەر پەی نابووتی ۋېت بناڵی.
ئاسمان جە قین دڵ ئاوەرد وە جۊش
هەم ڕەخش ڕەعدش ئاوەرد وە خرۊش
واتش من دایېم شاڎیی مەویاروون
عەرش و ساقی و فەرش لامەکان داروون
(حَمَلە العرش) زەڕین تاجم هەن
تەخت جواهیر پای میعراجم هەن
کەیوان هەفتەم جای (کەرّوب) م هەن
چوار مەلاییکەی (مُقَرَّب) م هەن
دایېم چوون وەهار من گوڵگەشتم هەن
زیاڎتەر جە گرد من بەهەشتم هەن
سەرجۊی (سەلسەبیل) مای تەهوورم هەن
هەزار هەزار حۊر بېقسوورم هەن
زېوەر و زینەت ڕەنگاوڕەنگم هەن
ئیستەبرەق پۊشان شۊخ و شەنگم هەن
سا تۊ چېشت هەن زەمین خاڵی
مەگەر هەر پەی بەخت سیات بناڵی.[1]