واتەو وەڵینا

ونۊ سیاو وەحشیەنە:
یان ماچان: بی بە ۋنەکۊ سیاو وەحشی، ئی واتۍ بنەمێوە تاریخیەش هەنە، باس جە کوشتەو(سیاوەش)ی کەرۊن، سیاوەش کوڕو (کەیکاوس)ین، سەردەمو ژیوایش مەگېڵۊوە پەی وەڵۍ نویستەی شانامەو فیردەوسی، ماچان: (سودابە) کە یۊوە بیېنە جە ژەنەکا (کەیکاوس)ی، حەزش چەنە کەردەن، بەڵام هۆڵەکېش سوودشان نەبیەن، نەتاوانش سەرنجەش پەی لاو وېش بکېشۊ، پەوکەی دەسش کەردەن بە بوختان کەردەی پەیش، کەیکاوسش پاسنە یاونانەنە کە دەسدرېژیش سەر کەردەن، پەی سەلەمنای بېتاوانیش، ئایېرێ گۆرەشا کەردەنۆ، سیاوەش دلۍ ئایېرەکەیرە چیسەر پەی ئەوسەری لوان، بەڵام چونکم پاک بېیەن، هیچش سەرنامان، ئا کارە کەسایەتی سیاوشیش لەکەڎار کەردەن، پەوکەی دماتەر سیاوەش پېوەڼیش کەردەن بە سوپاو (ئەفراسیاو)یۆ، ئاڎییچ کناچەکۍ وېشش پەی مارەکەردەن، بەڵام دمای ماوێ فرە نامەردانە کوشتەنش. هەواڵ یاوان بە تاتەیش(کەیکاوس)، جەنگێ توولانی مېیانو کەیکاوسی و ئەفراسیاوینە هۊرگیسیان، ۋنێ فرۍ مجیێنە، چانەیۆ هەر کېشمەکېشێ و هەر جەنگێ توولش کېشابۊ، واتەنشا: ئەرۍ ئینە چېش بۍ، بی بە ۋنەو سېیاوەحشی.[1]