کاسێوە چېرو نیم کاسەینە هەن
ڕېخەو مەسەلۍ کاسەیوە چېرو نیم‌کاسەینە هەن، چېشا؟
قەڎییم زەمان کەرەسەو فېنک کەرڎەیەو و هۊرگرتەی پېسە یەخچاڵی، فریزەر و فلاکس و یەخڎانی نەبۍ، خەڵکی ئا خوراکۍ کە زوو حەرام گېڵېنۍ، نیېنېشا دلېو کاسەی و کاسەکا یاگێوی فېنک و چېرزەمینو یانەینە، دوور جە زاڕوڵا هۊرگېرېنۍ، ئا کاتە کاسەی گۆرەتەر نوونېوە سەرشارە تاکو جە تەپ و تۊز و شەخەڵ و جڕوجانەوەری پېسە مڵەی و پشیلۍ دوورۍ بان.
کاسەی گۆرە یاگێ تەختەنە پاسە کاسە گولانەکەی پۆژنېرە کە چاشتێ و .. تاکو چن کاتێ هەر پاجۊرە مەنېوە. بەڵام ئاشپەزخانەنە ئا کاسە گۆرا سەراوچېر نەکەرېنېوە و یاگێوە تاییبەتتنە پاڵو یۊینە هۊرشا گېرېنۍ و کاسە گولانەکا جە ویکلەوە پەی گۆرەی نیېنۍ دلېو یۊی.
هەر پی بۊنۆ ئەر کەسېو دیایێش کاسەیوە گۆرە، ئاشپەزخانەنە سەرەوچېرا، بەپاو ئا کاسا چېرزەمیڼە بېنۍ، پاسە زانېنۍ چېرشەنە مشیۊ نیم کاسەیوە بۊ کە پی جۊرە وەڵادیم نریانەرە!
بەڵام چوون ئی هەرمانۍ ئاشپەزخانەنە ڕەسم نەبۍ، پاسە زانېنۍ فېڵ و کەڵەکێوی ئینا چېرو سەرەیشانە و گېڵېنۍ بزانا هۊو ئی هەرمانۍ چېشەن؟
پی جۊرە یەواش یەواش، مەسەلەو چېرو کاسەینە، نیم‌کاسەیوە هەن بە ۋاتاو فېڵ و کەڵەکی وەشە بییە.
[1]