لکێ بە دەس کریۊوە، مەوزەش دڎانۍ
دلۍ زوانی هۆرامینە یەرۍ نۊعۍ لکەمان هەنە، لکەو پەڕۊی، یام هەر پارچە بەڼێ یا قوماشێ، یەکەمەشان پەنەش ماچمۍ وەڵەفی، کە لکێ ساڎېنەو بە تەرزێ ئاسان مەکریۊوە، دوەمەشان پەنەش ماچمۍ؛ لکە، کە بە دەس مەکریۊوە، یەرەمەشان پەنەش ماچمۍ؛ لکەکۊرۍ، کە بە زامەت مەکریۊوە.
پەندێنە، مانێوە قووڵەی سووڎمەڼەش هەنە، ئی پەندۍ بەرهەموو تەجرەبێ وەڵینەکامانە جە ژیوایشانە، فرەو جاری هەرمانێ، یان گرفتێ ئاسانشا یاونان ناڕەحەتی و گرانی.
ڕەنگە گرفتێ خانەوادەیی فرە گولانە بە ئاسانی تاوابۊشا چارەش بکەران، بەڵام چوونکوم ئیرادێوە گۆرەشان نەبییەن، گرفتکەشا یاونان خەڵکا تەری، یان یانەو تاتەیشا، پەوکەی تەشەنەش کەردەن و دمایی بە زەحمەت چارە کریان.
پەندەکۍ پەنەما ماچۊ: هەر گرفتێ کە ڕوانەنە مەی ڕامان، با وەردەمو وېمانە چارەش بکەرمی، نەیاونمېش سەری وېما، ئاوەختە گرڎکەسێ بە قازانجو وېش قسېش چەنە کەرۊن.[1]