مشۊم بییەینە خەمو نەبییەی بوەری
مروڤ گرڎ کاتێنە بیەو گرڎ کاتێچەنە نەبییە نییەن، چەرخو ڕوزگاری بارو ژیوای ئینسانی فاڕۊن، مروڤی چامنە هەن ئیسە داران، بەڵام بە هۊکارو فاڕیای بارو زروفیۆ مەگنۊ و فەقیر مەبۊن. هۊکارۍ فرېنۍ پەی جە دەسدای ماڵ و سامانی، خېزیای جەنگ و جەڵەبەی، زەرەر کەرڎەی کاسپینە، جاری چامنە هەن هەرەسە مێ ملو کەسێرەو هەرچیش هەن جە دەسش مڎۊن.
وەڵینەکېما تەجرەبەشا بییەن، ویرمانە جە زەمانو هەرزانینە ئازووقەی فرە ۋزېنۍ و (یانەهۊمارەنە) هۊرش گېرېنۍ، واچېنۍ میەی گران بی، یام هامنېنە ڕزقێ فرەشا پەی زمسانی ۋستەن، نەک ڕابڕیای و گرانی گنۊرە.
خەڵک بییەن بە هەر مەڵامەتێ سامانش جە دەسدان، دمایی لات کۆتەن، ئانە بییەن بە تەجرەبێ پەی خەڵکی تەری و واتەنشا ئەشیێ جە کاتو بییەینە خەمو ئی ڕۊیشە واردێ، یانی گرڎو ماڵەکەیش ئەشیێ زەڕ نەبیێ، باخ و یانەش ئەسێ، ئاڵتوونش ئەسێ. بڕێ خەڵکۍ تەرۍ دەس وەڵێ، ۋیرو دما ڕۊیشا نەبیەن، هەرچیشا بیەن واردەنشان، دمایی دەسی بەتاڵ نیشتېنېرە.[1]