دەنگو دەهۊڵی دوورۆ وەشەن
ئەسڵو ئیدیۆمەکۍ چامنەن هەکە دهۊڵ دەنگش ڕەق و زلەن، نزیکۆ بېزار کەرەن، بەڵام جە دوورۆ خاستەرەن، مەتاومۍ واچمۍ وەش هەن. پېسە ئیدیۆمێ بەکارئامان پەی بەرکۆتەکا تەرو ژیوای، پەی نمونەی پاسە وەڵامەبۊوە هەکە فڵانە کەس، فڵانە خانەوادە، فڵانە عەشرەت و حیزب شانشا چامنەن و باڵشان چامنەن، خەڵکی جە دوورۆ چېش مژنەوا، ئانەی ماچاوە، بەڵام وەختێ نزیک مەبیۆ چەنەشان، مەوینی تەمام پېچەوانەن.
پەی واردەمەنی یان چاشتخانەیچ هەر پاسنەن، بڕێ جە خەڵکا تاریفۍ واردێوە، یام چاشتخانێوە مەکەران کە واردەش فرە وەش هەن و لەزەتیەن، بەڵام وەختێ وېت ملی، یام واردەکەی موەری، مەوینی پاسنە نییەن.
دلۍ میللەتێ داگیرکریاینە چن کەسێ، یام پارتێ سیاسی قیت مەبۊوەو داواو مافو ئا میللەتەیە کەرۊن، چەنی داگیرکاری مەگنۊ جەنگ، خەڵک بە ڕزگار کەرو فریشتە مەوینۊشان، بەڵام وەختێ داگیرکار جیامزۊو ئاڎۍ مەیاوە و دەسەڵات جە دەس مەگېرا، کەچی خەڵکی ماچان ڕەحمەت کفن دزی وەڵینی، خۊ ئینە دوورۆ زەریفۍ بېنۍ، نزیکۆ چامنۍ نییەنۍ.[1]