نەوەشیەکەو مام عارفی

ئی جارە ملمێ خزمەتو پیېوە ئیماندارو دەگێکێ دەرەومەڕێ
ئاڎیچ مام (عارف کوڕو سعیدی کوڕو احمەڎی کوڕو ئیسماعیلی کوڕو ڕەسوڵین) ساڵەو (1870ز) ی جە ئەڎێ بېیەن، ئی کەسایەتیە نەوەش گنوونەو بەراش پەی بەغڎای، برایېوەش بۊ بە نامۍ (محیەدین) یوە، دماو ئانەی کەزانۆ عارفی براش ڕوانەو بەغڎایشا کەردەن، ئێڎیچ ئۆقرەش چەنە بڕیۊنەو وېش پېچۆوە بلۆ قوڵاخێش کەرۊ، وەختێ ملۆ هەڵەبجە پاسە تەختەینەکەی جیائاستەن، کەئادەورانە بەینو سلێمانی و هەڵەبجەی هەر ئا پاسە تەختەینەش چەنە بېیەن، شەوۍ چا مەنۆوە، سەعبێ گنۆ ڕا، بە پەرسا پەرسای هەر نۊعێبۊ وېش یاونۆرە بەغڎا، ئا نەوەشینێ کە چېوە ملا ڕوانەو خەسەخانېوە تایبەتیشا کەرا جە بەغڎانە، ئێڎیچ ملۆ خەسەخانەکە وەختێ مڎیۊ کابرێوە نیشتەنرە فەرەنجیېوەش کەردەن ملو جلا خەسەخانەکەیشرە، کە کوچێ دێقەت مڎۆ، مڎیۊ عارفی براشا، دماو خەیرئامایو وەشی و تشی ماچۊ: ئی فەرەنجیە چېشا کەردەنت ملو ئی جلاترە، ئاڎیچ ماچۊ: ئینە ڕەمزو ناسنامەو ئېمەن مەگەر مەردە شۆرەکە پۊرەمرە وەژۆش، ئنام لاش نمەبەرو، شۆنەو ئانەیرە هەواڵپەرسی نەوەشیەکەیش پەرسۆ چەنە، بە محیەدینی برایش ماچۊ: چن ڕوێن نەوەشنا؟ ئاڎیچ ماچۊ: حەوت. بەدەمو گرەوایۆ واتش: دەی دوێ ڕوېم مەنەن وەشبۊوە، چوونکە ساڵێشا لاو بزاوە بێنێ (دارەقوتڵە) ، بزێما لوا دلێ گەنماو تەوەنێم پەی شانا ماڵام شاخشرە، نۆ بڕێ زەمینێ سەرەش کەردۆ پۆخیرە جە عەزرەتیێنە منیچ واتم: خوا ئەجرو ئی بزێ نەوزی قیامەت، دنیانە چەنەم سانی، چەنی گېڵانیۆ سەرئاماکەی دەسشا کەرد گرەوای و خەڵکو خەسەخانەکەی مجیێ ملشارە.
دماو ئانەی وەختێ محیەدینی تۆشەش کەردۆ کە بەعزێ نانی پەزێرە و کوچێ پێخۆرش چەنەبۍ، وەختێ وردێباوە تەماشەکەرا کڵاو زەڕێ ئینا دلێ تۆشەبەرەکېشنە، کە ژەنەکېش نیاننە وەرو ئاننەی نەک ئیحتیاجشبۊو ورەشۆش پەی خەرجیش، وەختێ عارف کڵاوزەڕەکێ وینۆ ماچۊ ئافەرین براڵە پەی وېت و ژەنێت، بەڕاسی ژەنێ سالارەنە، دماو دوێ ڕوا خەسەخانەنە بەرشا کەراو مەیاوە پەی دەگێ، ساڵەو (1948ز) ی عەمرەو خوڎای کەرۊ.
هەزار ڕەحمەتێ جەقەبرەکېش و ماواش بەهەشتبۆ.
عەفان دەرەمەڕی.[1]