کۊڵبەر وەڵۍ گرد چېویەنە مشیۊ، سەر و ماڵ و گېیانش پارېزیۊ

ئیتر مەبۊ هیچ ئەرکێوتەر چی شەرایێتەنە بنریۆ سەرو شاناش
پەدیدەو کۊڵبەری چېوێوی تازە نیا، جە زەمانێوۆ کە مەرز (سنوور) بەینو وەڵاتەکانە وەش بېیەن، کۊڵبەریچ بە تەمامو بەشە جۊرواو جۊرەکاشۆ سەرش هۊردان و جە لا حکومەتەکاوە پېسە ئەرک و هەرمانېوی غەیرە قانونی دریان قەڵەم.
ئی حکومەتێ بە بەهانێ غەیر قانونی بېیەی ئا کاریە، هەر چن وەختێ جارێو جەمېو چا خەڵکیە وزانە دلێ گۆماوەو ۋنێ کە تەنانەت ڕەحم بە وڵاخ و بارگرفتەکایچشا نمەکەران.
کۊڵبەر بەڎبەخت تەرین و زەحمەت کېش تەرین و جە هەمان حاڵەنە بۍ دەسەڵاتترین قشر (توە) جامێعەیا.
کۊڵبەری جە کۊردسانو ئێرانېیەنە و بە تایبەت جە هۆرامان بېیەن بە مێهنە و ئەرکێو کە سەرەڕاو خەتەری گېیانیش، فرەو خەڵکی کە فرەتەرێشا جوانێنێ ڕوەشا ئاوردەنەنە.
ئەر دەسەڵات یا سیستمی حکومەتی هەرمانېوی ئینسانی پەی ئی مەحروما جامێعەیە پېڎا کەرۊ ، هیچ کەس حازر نېیا کە پەی تەنیا سێر کەردەی لەمەو وېش و زاڕۆڵاش گېیانش وزۆنە خەتەر.
کۊڵبەر، زەحمەتکېش، کارگەر، بەنا بە وەزعەو هەرمانەکېش، هەمیشە ئینا مۆبارزەنە، هەم چەنی سیستمی، و هەم پەی سێر کەردەی لەمێش.
ئی پەدیدەو کۊڵبەریە ئارۊ هەن، چارە چېشا؟
ئەوەڵین هەنگام ئانەنە کە خەڵکی کەردەن، تەزاهۆرات و تەحەسۆن پەی پارێزنای گېیانیشا و قانونی کەردەی هەرمانەکېشا (یا لائەقەل چارە سەرێو پەی چەنی ژیوایشا) .
دوهەم، تاکو زەمانێو ئی حەرەکەتە ئێعترازیە، نەبېیەن بە حەرەکەتێوی سەراسەری، ئەرەنیای ئەرکێ زیاڎە سەرو شانا ئی تەبەقە مەحرومەیە، بېژگەم وێ کۊشی پەیشا (چی شەرایێتەنە) هیچ بە ئەرمەغان نمارۆ.
ڕەزا بەهمەنی.[1]