سیاو ڕێحانە دلۍ ترازیەو هۆرسەنگنای (نەقدی ئاگا) یەنە
بەشۍ: یەرەمە
لایەنێ ئەرێنیێ سیاوڕێحانەی:
پېخام: ڕۆمان، مشیۆ پەی وانەری پەیامش پنە بۆ و، پېخامەکەیش بە ڕۆشنی و ڕەوانی، بدۆ دەسو وانەریەۆ.
کاک ڕەزای بە ڕۆشنتەرین شێوە پەیامەکەش یاونان، پەیامەکە ئینەنە کە:
زادمانێ (نەسڵێ یام جیلێ) تازێ، ئێتر چی دەۆرەو زەمانەنە کە ئینسان خەریکا بە ترۆپ و شارسانیەتی(تەمەدۆنی) بیاوۆ سزاوارنیا ئی زانشت و ئاوەزیشە بنیۆ گرەۆو باوڕە میراتیەکاو خێڵایەتیەکا و باو باپیراش کە بە میراس و مەردە ڕیگی چەنی وێشا ئاوردێنێشا. ئەگەر قەرارا جە دلێ مەدەنیەتیەنە و دنیای گولانە بیەو ئارۆیەنە زیندەگی کەرۆ، ئێتر ئا پێوەرو، پیمانە و، عەیارە کۆنێ باوشا نەمەنەن و ناچارا وزۆشاوە لا، فڕە دریا. ئا کەۆچێ(کاسەمن) کە کاک ڕەزا باسش کەرۆ، (60) ساڵێ چێوەڵتەر یاگێ ویش داش بە کیلوی کە پیمانە یا پێوەرووەزن کەردەیا و گردو دنیای مژناساش.
کۆتا و سادە نویسەی:
ڕۆمان نویس مشیۆ تواناش بۆ بە زوانی سادەو گرکەس ئەنەیاو، ئانەیە کەئینا دڵشەنەو ویرو ئەندیشەشەنە، بارۆ نوکو خامەیشو بێ پێچ و پەنا تەرسو لەرزێۆ وزۆش سەروکاغەزی و، سەرەنجام، وەرو چەمو وانەریش. ئەوە شارای و پەنا وستەی و چێرولچاوەکەردەی و...، دلێ داستانیەنە، میاونا کە: ڕۆمان نویس جە کارەکەشەنە لاواز وبێ تین و تاوشتا. من وێ سانسۆر کەردەیم جە دنیاو ئارۆیەنە بەهیچ پاساوێۆ لاوە پەسەند نیا.
یاونای ماناو مەفهومی و کۆتایی ،جە لاو فرەو کەساوە، بە خاڵێوەی ئەرێنیەو ڕۆمانی دریاینە خامە. یانێ نویسەری توانا و سادەو کۆتا نویس، ئانەنە کە بە کەمتەرین واژێ بتاوۆ گەۆرەتەرین مانای بیاونۆ، هەڵبەتە بە زوانی باوو زەمان و، وێش و پا شێوازو ڕەوشتە کە پەسەندو ڕۆ یا، بە فامو دەرکو کۆمەڵگای نزیکا. سادە و ڕەوان نویسی، نەک تەنیا دەلیلەو کەم سەوادی یا بێ سەوادی نیەنە، بەڵکوم بە پێچەوانەۆ، نیشاندەرو ئانەیەنە کە نویسەر جە بارەگرتەی جە سادەتەرین واژانە، داراو هێزو توانێوی جیاوازیا. پێجەوانەیچش،یانێ چێرو لچاوەکەردەی و ناڕۆشن نویستەی و پەنابەردەی ئەۆ واژای کەم مەسرەفا و عەوامانا و بێ ڕەگ و ڕیشا، یام بە کاربەردەی جۆرە ڕستێوی کە تانشا لاو پۆێشا نمەیاوۊ، ماناش ئانێنە کە نویسەر ویچش بە ڕۆشنی نمەزانۆ، خەریکا چێش ماچۆو،چێش منویسۆ! چی زەمانەنەو چا وەڵاتو وێمانە داخەکێم پەتایوەی ئەوە نەبڕیاینە.
کەیۆمەرس نیک ڕەفتار.[1]