پەیلوایێ سەرو ڕۊمانەو سیاو ڕێحانەی
وەڵێنه:
سەرەتا پېسەو ئەرکێوی فەرزی و هەر پاسه حۆرمەتێ تایبەت که پەی مامۊسا (حەمە ڕەزای) هەنم دەس وەشیش کیانوو پەی و هیواڎارەنا قەڵەم و ئاوەزی بەرز و وێپایانەو ئینسانی و هۆرامیانەش پېسەو سەرسەوزی گوڵزارە سەرکەشەکاو هۆرامانی وەهار ئاسا ڕەنگین بۊ.
یۊ جه تایبەت مەندیەکاو ئی ڕۊمانێ ئانەن لاو منۆ که نویسەرەکەش جه وڵاتێ غەریبەنە که ساڵهای ساڵەن جه جغرافیاو ژیوگاو جه ئەڎابېیەیش دوورەن، ئاندە به سەلێقێوی هۆرامیانە دەسش دان قەڵەمی، سەرە ڕاو ئانەی که زوانی هۆرامی به تەمامی جه گرد بوارێنه تەنانەت جه مەحاڵوو هۆرامانی کەوتەن پەراوێز، نویسەرێ که کێبیه (هویت) و شناسوو وېش و زوانی ئەڎاییش نمەفاڕۆ وە به هیچکام جه وەشیەکاو ژیوای. بېگومان مشۊم ڕۊمانەکێچش هەتا هۆرامان هەن شۊنەماش دلێ ئەدەبېیاتینه گنۆ وەرچەم.
هەر چن ئی بەر ویرە هەڵەی زوانی (غلط املایی) فرەش چەنەن جه بواروو نویسەی به زوانی هۆرامی، بەڵام ئینه خۊ هەرگیز جه گەورەیی و بەرز بیەو ڕۊمانەکێ کەم نمەکەرۊوە، به پەیلواو من هەر نویسەیێ ئەدەبی چه نەسر بۊ جه شێعر گەورەیی و تەمام بېیەیش مەگېڵۆوە سەرو پەیامەکەو دلێش که چه سەمەرێش بۊ پەی کۊمەڵگای.
هەر پاسه که نویسەر وېش باس کەرۊ و منیچ هەنا سەرو ئا پەیلوایوە زوانی هۆرامی ئیسه کەم کەم خەریکەن یاگه گیربۊ ، بەڵام ئێمه ئیسە جه مەحاڵوو هۆرامانیە زوانێ پەی نویسەی هۆرامی سەران سەریما نېیەن که گردما به یەک شێوە پەنەش بنویسمێ، به هیواو ئانەی ڕوێ بەی وەڵێوە که ئېمەی هۆرامی زوان قسەکەردەیما چەنی نویسەی ڕېک و پێکی هۆرامیانەیما جه یۆترینی جیا کەرمېوە.
نامۍ کتېبەکەی(سیاو ڕېحانه) یۊ جه تایبەت مەندیەکاو تەروو ئی ڕۊمانینە، که لاو منۆ فرە وەش و به یاگێن، ئینسانی بەرۆ دلێ عاڵەموو خیاڵاتی و ڕاوېیاروو هەتا هەتایی هەوارگاو یاری.
من سەرو ڕۊمانەکێوە هیچ پەیلوایم نېیەن پېسەو ئیراڎ یام (نەقدی ئەدەبی)، چوون به ڕاسی هەرمانەو من نېیەن، تەنیا ئانەی ماچوو ڕۊمانێونە که ئینسان به یەک جار ونایوە چەنەش سێر نمەبۊ، من هەر جار ئی ڕۊمانێ وانوو وە پاسه مزانوو دلێ گوڵزارێ پەڕ جه عەشق و وەشەویسینه خەریکوو گېڵاینا، زوانی ساڎە و دڵگیر دلێ ئی ڕۊمانێنه به تەمامی حاڵ و هەوایێ وەش مڎۆ به وانەری، واچەکێ دانه به دانه کەیلاوێنێ جه وەشەسیایی، بەیان کەردەو داستانەکێ ئێنه وەش کەوتەن سەرو پەلە چەرمەکاو کاغەزی وانەری به خیاڵ بەرۆ وە ئا دەورانه ویەرڎە که چېش ڕوەش دان، چېگەنە عەشق و مێهرەبانی سەرچەمەو ئاوەزی بەرزی ئینسانین و گوزەروو زەمانەی ڕۊشن کەروو ژیوای درۆسی و نادرۆسی ئینسانەکا نیشان مڎۆ ، گوزەروو زمانی ویەرڎە تەنیا بەڵگێن پەی زیڼه کەردەو واقعیەتەکاو ژیوای ئینسانی.
جوانمیرگوران کوساڵان.[1]