یاڎەوەریەکېم
بەشو: پەنجی
کیسێم پەڕێنێ قۊمیا نەترووکیاوەکان. جە کیسەمەنە ڕاشان نمەبۊوە، خەریکەن بتەقۊوە و لافاوە قسێ و لافاوە کەلیمێ، نەئاکەلیمێ کە گېیان مڎانە بەشەری و ۋنېش تەڕ بکەرانە و جۆشناش و خرۆشناش. تەلەفزیۆنی تەماشا مەکەرینە حەر خەبەرێ ڕەق و تەقێ ئازاردەرێ پژگنوونە. میاچەمایت ماسنانە، دەس و پل و مەژگیت گېرۆنە وێ و هاسانش مڎانە. موبایلەکەت لەمەش پەڕەنە قسێ و ماسانەنە کیسەت. جە فەیسبووکەوە گېرەش تاکو توویتر و ئینستا و هەزاران تەڕەماشێ تەرێ لەمێت ماسنانە و سەرەیت پەڕکەرانە خەفەت و ئازارە و هەواڵێ بۍ سەروبنێ. ئیجا خۊ شەڵڵای بەخوای بەس دلێ لەمەکېشان بېیایێنێ، چڕووچەم و جەسەی نەبییە و قڕووقیافەشان ڕوەداوېش چەنە چکارە. مەجبوور بینە هیستۆرییەکەیشان بوینی و بوانیشوە. ئیجا ئاڎیچێ وېشان داستانەشان پەنەنە و ڕوەداوێ و خەبەرێ. ماچوونە کیسێم پەڕێنێ و ڕاو ئی گرد خەم و خەفەت و خەبەراشان نېیەن. هیستۆری هەن وېش گۊشېوە جە چەماش و ملش دیارەن و چڕووچەمش، کە چېش دلېنە بەشێوە و یان دوێ لاپەڕێ کتېبەکەو مارکس و ئینگلسیش، کۆپی پەیست (copy paste) کەردەن، نە متاوی نزیکش وزیوە و نە متاوی زەڕەبینش گیرینە تاکو بوانیشوە، منیچ جە ڕۊمانېوە زیاتەر جە (300) لاپەڕێنە، کوتڵێوە قسێ جە نویسەرەکەیش چکنوورە هیستۆری، سەوای کە تەماشاو ڕەفێقەکام (freind) کەروونە زیاتەر جە (150) کەسا و بڕێ وەخت زیاتەری وینان. ئیتر نمەزانۇو وانابۆشاوە یان ئینتزاروو عەکسێوەشان بییەبۊنە کە گورج تەماشاش بکەرانە و بوییەرانە، بلانە ڕاو کاروباریشارە. ئەی نمەواچوو کیسێم پەڕێنێ ڕوەداوە نەترووکیاوەکان، ئیتر چېش واچوونە و چېش عەرزتان بکەروونە. نە متاوونە چینەی زیاتەر بوانووشاوە و نە متاوونە وەرشان بکەروونە.هیچیچ شان پەنە نمەکریۆنە کە عەمەلشان پەنە بکەرینە. ئەی عەللامەی ڕواری مەفەرماوۆ:
هەرچېوەت وانا، یۆتەر بوانە
بابێوەت زانا، یۆتەر بزانە
وانات و زانات، وەرش بکەرە
زانات وەرت کەرد، عەمەل باوەرە
عیلم چوون درەخت عەمەل سەمەرەن
عیلمیی بۍ عەمەلەل باخیی بۍ بەرەن
هەرچېو زایێع بۊ، پەرېش هەن بەدەڵ
ئیللا بۍ بەدەڵ، عومرەن و عەمەڵ
حەیفەن عومروو وېت، بدەی بەزایە
چیی دونیا بەرشېی، بۍ مایە و فایە.
بورهان ئەختەر.[1]