یاڎەوەریەکېم
بەشو: حۆتەمی
ماچۊ، واچۍنە: چاوەڵیی فرە ڕق و کینەمان دڵەبێ، ھەنوو شمە ماچوو، مزانینە. ھەنوو ڕەفتارەکانتان، ھەنوو کۊششی و موبارێزەکەیتان. تاکو ئی چن ساڵێ و تاکو ئێساڵ کە ژینا جە غەریبینە کەردەشان قوربانی. مەزڵوومانە ئا کناچە عال و پاک و بۍ گەردێشا، شەھیدە کەردە. واچېنە، نەزانێمێ شمە چېشتان گەرەکەن، چېشتان ھەدەفەن. بڕێ وەخت حەر وېماوە چەنەتان موتەنفێرێ بێنمێ. ئەجېمان گەرەکتانە ئی وەڵاتییە شێوندێ و لت و پارش کەردێ، کوچ و گەڕ و بۍ نام و نیشانش کەردێنە. ئەڎا و تاتەیما و کوڕ و کناچەکاما بەرڎۍ و سەرەشان بوەردێ.
ماچۊ واچېنە: ھەرلایېوە لوایێنمێ و جە ھەر یاگێوەنە نیشتایێنمێرە و جم و جووڵێمان بکەردایە، پاسنەمان پەنە واچېنێ و مووچیاریمان کەرېنێ، جە مزگییەکانە، جە کوڕ و کۆبییەی و، وەشیی و ناوەشیمانە، پاسەمان پەڕێ کەرېنێوە کە شمە پیس و گڵیاوۍ و نەجێسێ و لەکەنمازێندێ! سەرە لاشەمانەوە نمازدێ، ڕەگ و ڕیشەتان جیاوازەن و پیس و پۆخڵەن.
منیچ نەرکردم ئی گوفتمانە و ئی دەردەدڵە و ئی ویتەویتە پا جۊرە سەرە نریێۆوە و تەمامیۆ، واتم: ھەرچن ئېمە پاسەفکر نەکرێنمێوە و ئا دیڎ و ئاوەزەکۆنە و موتەحەجێرانەمان نەبېنە، بەڵام ئېمەیچ زانێنمێ کە ھەر شارېونە بېیایێنمێ و ژیوایەنمێ و دەرسمان بوانایە و شرکەتێونە کارمان بکردایە و کارگەرێ بېیایانمێ و جە ھەرشارېونە گوزەرمان بکردایە و گەشت و گوزەرمان کەردایە، بە چەمېوە خائێنانە و ڕەگەزپەرستانە تەماشان کەرېندێ. ئیسە بە یۆمن و پافەڕوو ئی باروودۊخییە و ئی شۆڕشی و گېیانوو شەھیدا و نازارە بۍ سەروشۆن و مانیا و مەکەتا ئی مەینەت و ئازار و موسیبەت بارییە کە ئامان سەرمارە و بەرەکەش گرتێنمێنە، حەقیقەت و دەرد و موسیبەت ئازارە و دەربدەری و جەنگ و بەدیل گرتەی بەناحەقی و سێدارە و سەدان دارە، ڕۊشن و ئاشکار بېیەن و ئا گرد چېوا کەوتێنێ سارا. دیارەن کە ئایین و مەسلەک و ئاوەز و فکر و ئەندێشە و زوان و کەلتوور و جوغرافیا و تاریخ و خواست و ئارەزوومان مومکێنا یۆ نەبۊنە و پېسە یۆی فکر نەکەرمېوە، بەڵام ئی ھورئێستەیە و ئی یەک دەنگی و یەک درووشمیمان کاروو وېش کەرد و زیاتەر جە (50) ساڵێ وستیمێش وەڵێ. فکر و ئاوەزیی ڕۊشن ویرانەش چپنا پۊرەمارە و وستیمێش ساراو ئەدیشەی ئازادی.ئینە چېوێوە کەم قیمەت و بۍ خێرووبەرە نېیەن. ڕەنگەن چنھا ساڵێ مێزێ چنیایێنێ پەی کۆڕ و کۆبییەیوە و پانێلێ عێلمیێ و کونفرانس و سمینارێ گیریایێنێ پەی نزیک بییەیوەو ئی ئەفکار و ئەندیشەیە کە ڕەنگەن زیاتەر جە یەک سەدە سەرشرە هەرمانە مەکریۆنە، ئێڼەو ئی جەرەیانە فیکری و ھورئێستایوە ئاڼە ڕەنگ وبۊ نەدېوە و ئی ئینسجامییە نەخولقنێ.
چینەی زیاتەر چېش واچوونە!
بورهان ئەختەر.[1]