نەقشو ژەنا جە پارېزنای زوانی ئەڎایی
ئەرەنیشتەو ئاروی ئەنجۆمەنو ماموسا بېسارانی سنەی سەرو نەقشۆ ژەنا جە پارێزناو زوانو ئەڎایی.
ئارۊ بە بەشداری ئەنداماو ئەنجۆمەنو مامۊسا بېسارانی و مێمانە ئازیزەکا، ئەرەنیشتەیەتەر سەرو باوەتو نەقشۆ ژەنان جە پارێزناو زوانی ئەڎایی لوا ڕاوە، بەسەرینج چانەیە کە نەقشۆ ژەنان وتایبەتەر ئەڎای  جە پارێزناو زوانی، فەرهەنگی وئەدەبی فرە گرینگ و یاگەدارەن، تەقالای فرەتەر چی باوەتەوە بەلازم زانیا. ئی بەرنامە کە بە دەبیری دکتۆر مۆکەڕەم غەفاری لوا ڕاوە، سەرەتا بە ئاماژە سەرو ئەرزشەکان وکاریگەری نەقشۆ ژەنان جە وېیەردەنە، واتشا لازمەن جە باوەتهایە جوراوجور پەیجورکاری پەی ئی باسەیە کریۊ، بە لازمشا زانا ئەرکو ئارۊ ژەنا شی کریۊوە. دکتۆر غەفاری جە گۊشەیە تەر سەرو کەمتەرخەمی وهێرشو بڕێ کەسایەتی وماڵپەڕێ سەرو سامانی فەرهەنگی هورامانی قسێشا کەردێ، واتشا لازمەن وریای بێمۍ چی باوەتانە بەیمێ دەنگ و تاریکیەکا ڕۊشن کەرمېوە. باوەتەی تەری گرینگ جە قسەکانو دکتور غەفاری سەرو بەکاربەردەو دروسو موبایلی بۍ، کە واتشا فرە لازمەن وریا وهۊشېیارێ بێمۍ بە شێوەیە زانستیانە زاڕوەکاما موبایل بەکار بەرا کە خەسارەی فرە بەتایبەت جسمی وەش کەروو.
کاک نایب منبەری: لازمەن جە کۆڕ وئەرەنیشتەو مێمانیەکانە پېخامو وېما یاونمێ ودەنگما چی ئەنجومەنەیە بەرزتەر کەرمېوە.
خانم شەفێعی: نەقشۆ ژەنان جە وېیەردە چەنی ئیسەی جیاوازەنو بڕێ ئەرکو هەرمانۍ کە مەشېیایە ژەنەو هۆرامانی زوو کەردایەش ئیسە ئا ئەرکە واڕیان ، بەڵام ئیسە لازمەن ژەنی وېش بە عیلم و زانایی تەیار کەرۊ، قەڵەم هورگېرۊ بەزانایی و زانیاری کەسایەتی وېش و نەسڵو وېش بەرز و ڕۊشن کەرۊوە.
خانم ڕەشیدی (دادا هۆما) : باسش جە زانایی و ئاگا بېیەی ژەنو ئارۊی کەرد، واتشا زوو بەداخەو نەسڵۆ ئېمە بەزوانەی تەر زاڕۆڵێما گەورە کەردێ، بەڵام هاگاڎاری و زانایی دوەبارە ئېمە هۆرگېڵنۊوە پەی ئەسڵو وېما .لەکی و هورامی نزیکیشا یۆوە فرەن و ئېمە بە سەواد خاستەر وېما شناسمێ.
خانم بیگلەری: ئەڎاکاو ئېمە بە لالایی وبە عێشقەی فرەوە زاڕۆڵێشا گەورە کەردێ و فەرهەنگەی گەورەشا خۆلقنا، ئەر ئی فەرهەنگ و ئەدەبە سینەبەسینە و دەمواچ نەویایە ئیسە زوانی هورامی نەمەنەبۍ.
لازمەن تەقالاما فرەتەر کریوەو زانایی و شعوورما بەرزتەر بۊوە و یاگێ ژەنان و پایەگاش بەرز و ڕەسەن بۊ کە کۊمەڵگای ئێنسانی گەشە کەرۊ، کە بە داخۆ چی مەسیرەنە ژەنی تووشو ڕەنج، ئېش، سوکایەتی و هێرشی جوڕاوجور بېیېنە.
کاک جەواد حەمزە باسەی گرینگش سەرو ژەنەو وېیەردەی و ئارۊی کەردو کاریگەریە مەنفیەکاو سەرمایەداری سەرو کۊمەڵگایو بەتایبەت ئەڎای  باس کەرد، واتشا ئی فەرهەنگ و فوڵکلور و دەمواچە ساماندارە کە هەنما هنو ئانەیە بېیەن ژەنی نەقشو ئەڎاییش خاش بە یاگێ ئاوردەن. بەڵام بەداخۆ ئارۊ بەهۆکاری جوراوجور ئی نەقشە فرە کەمتەروە بېیەن وخەسارش بار ئاوردەن.
کاک ڕەحیم غۆڵاموەیسی: واتشا بە ئێستێفادە جە سامانەکان کە دانشگا و دەسەڵاتو مەڎۊ پەنەمان پەی گەشەو فەرهەنگ و زوانو هورامانی بەکارش بەرمێ.
کاک هاشم حسامی: ئاماژەشا بە باوەتو فێرکاری و بارئاوردەی ئی نەسڵەی کەرد کە مەشۆ بە زانیاری و ئاگامەندی تەیار کریا کە بنەڕەتەکاو وېشا کە جە زوان و فەرهەنگو هورامانی هۊرخېزیان  سەرچەمە گېرۊ.
وەلی کاکایی: سەرو کەمتەرخەمی ئەڎا و بابەی پەی بارئاوردێ بەتایبەت کناچا، تەرک کەردەو وانای وکاریگەریە منفیەکاو موبایلی قسێش کەردێ و واتشا مشۊ ئی باوەتێ خەسارشناسی کریا،
هۆنەرمەند وپەیکەرتاش کاک حسێن عەلیرەمایی بېسارانی کە کارە هۆنەریەکاش چی باوەتەنە سەرو وېشناسی و گەشەو فەرهەنگ و ئەدەبی کاریگەرێنێ بە  درۆست کەردەو پەیکەرو کەڵەشېرەی  ئاماژەش بە واتایە عالی کەرد  واتشا نمەکریو و نمەشیو ئېمە زوانو وېما ویر بەرمێوە و تووشېیارو بۍ شناسنامەیی بیمۍ،
کاک عەلی تفێنی، کە ئامایشا یاگێ دەس وەشی بۍ بە وەنەو سیاچەمانەیە ڕەنگ  و ڕۊحو ئېمەش  بەردەو پەی هورامانی و ڕەسەنایەتی.
ئاینازخانم مەنسووری، کناچۍ خانم بیگلەری شێعرەی زاڕۆڵانێ عال و جوانەش وەنەوە کە یاگێ  وەشحاڵی و دەسوەشی جە وېش و ئەڎا و بابەیش بێ.
سپاس جە کاک ئازاد خانی کە چی دوە ئەرەنیشتەیە ئەرکو وێنەگېرتەی هەن سەرو شانەیشاوە کە یاگێ سپاسی و پەنەزاناین، سپاس جە بەشداری گردو ئازیزا.
وەلی کاکایی.[1]