ئیقباڵی چەفت
هەرکەس وېنەی من ئیقباڵش چەفتەن
نەواچۊ هەی ئاو، نەصیبش نەفتەن
بېسارانی شاعېرو عاشق جە وەختو دەرسو دەورینە جە مزگیەکەشەنە دارچنار نمازۊ باڵاو یارېش دیاربۊ
وەباد قودرەت لەتار لەتار بۊ
نمازۊ باڵای قیبلەم دیاربۊ
جە شەوېچەنە ئایېرو دووری مەعشووقېش دەروونش مەسۊچنۊو جە ئېش و ناڵەش کەس نمێ فریاشۆ.
سۊتەی بېسارانی لاشە نېیەن، بەڵکوم دەروونشەن. جە هاوار هاوار کەسێ ڕاو خوڎاینە پەلامارەو گۊزە ئاوۍ مڎۊ پەی کۊشنایۆ بېسارانی، بەڵام جە بەختەو ئاڎیی گۊزە نەوتەن، ئیتر بەیەکجاری هەتا سەحەر مەسۊچۊو شەماڵ بووڵەکېش مەبەرۊن پەی کەش و کۊی.
دیارەن ساحیب گۊزە ڕەقیب بېیەن، کە بە قسۍ گولۍ دەروون و بېسارانیش بە یەکجاری گڕدان. ڕەقیبی زاڵم دیارەن خەبەری گولش پەی ئاردەن و تاکو دەمەو بەیان ئایېرش وەردان دەروون و بېسارانی.
ئېشەو ئایېرێ گڕ بەست نە دەروون
بڵېسەش یاوا بە سەقفی گەردوون
جە کوورەی ئایېر، جە بڵېسەی نار
ستېزام چوون بەرق، ئاو کەردم هاوار
جە هاوار هاوار، شەفاو لاڵەی من
جە هەی ئاو هەی ئاو، شین و ناڵەی من
تومەز مەژنەوۊ یەک خوڎا تەرسێ
موسڵمان سیفەت ڕاگەی هەق پەرسێ
ماوەرۊ گۊزەی نەفتی بەیت المال
مەشانۊ وە ڕووی گڕبەستەی شەماڵ
پېسە مەزانۊ یەگۊزەی ئاوەن
تومەز خۊ یە نەفت تەوەن پۍ تاوەن
گۊزەی نەفتش کەرد وە بڵېسەمدا
قرچەی گۊزەی نەفت وە ستېزەمدا
هەرتا سەحەربی هەر سۊزام بە سۊز
سەحەر سفتەکەم با بەردش چوون تۊز
هەرکەس وېنەی من ئیقباڵش چەفتەن
نەواچۊ هەی ئاو، نەصیبش نەفتەن.
ئەسعەد ڕەشید.[1]