شەوەو گاوە سوورێ
بەشۍ: دوەمە
لالۊ ڕۊسەم تاوەو ڕاینە ماچۊ: نەوزدێش پەشتەو گۊشی جە من واتەی بێ، بەش ئی شەوە سەختێ بەرمێ سەر
چەنی ئینەیە لالۊ ڕۊسەم لوا، ورەۋر کەوتەنە دلێ جەمەکێ و بڕېو ورکەو دڵەڕاوکېشا کەوتە وەر، یۊ ۋاچۍ یانێ وەرۋە وارۆ؟ یۆتەر ۋاچۍ یانێ ئی قسێ ڕاسەبۊ؟ یۆتەر ۋاچۍ یانێ ئێڼە قورسە؟ یۆتەر ۋاچۍ لالۊ ڕۊسەم ژیرا چېوێوش چەنە مزانۆ با بلمێ تەگبیروو وېما کەرمۍ.
ئاڼەشە پەو نەشی جەمەکێ تێکە شیە. خەڵک یۊ یۊ چرێنێ یەکترینی و واتەکێ لالۊ ڕۊسەمی دەم بە دەم گېڵنێنێوە پەی ھەنترینی کە بەشکەم بتاوا گېیان بەرکەرا.
چی عانەنە قسێ یاواوە لاو کێخای، تاکو ئەژنەویەش میاچەماش دا پێوەرەو واتش چېش!؟ لالۊ ڕۊسەمی واتەن؟ بە زەردەخەنێو، لالۊ ڕۊسەم، نەک لوقمانی حەکیم!
قەڎیمی واتەنی (مەڵڵا نەبۊ دەگانە کەرەشێڵ بەڵقاسم‌بەگا) ، خۊ من ھەڵای نەمەردەنا، با ڕۊبۊوە چارش کەروو، ئی دەگای یام یاگێ منەنە، یام یاگێ ئاڎی!
چېش بی ئاڎ گرد چېوێو مزانۆ، خۊ لاو خوڎایەو نامانەو، کەس گۊشش نەدارۊنە، ھەرکەس گۊشش دارۊنە دەگانە بارش پەنە کەروو.
خولاسە بڕېو مووچیاریەکەشا تەرسەو کێخوایەنە وس پەشتەو گۊشی، بڕېویچ ھەژاری و بێ‌دەسەڵاتیەنە حەیوانشا مشتە نەکەوت و نەتاواشا مووچیاریەکەی بەرا ڕاوە کە پەنایچشا بەردە ھامسا و بەرھامسای و قەوم و دۆسی دەسەڵاتداری، جوابەنە واتشا کورە گۊش مەڎەیدێ، لالۊ ڕۊسەم دیارا وەنەش قۆمیان، ئېمەیچ حەیوان سەرە مەبڕمۍ.
ماریا عەزیزی.
[1]