خیانەت گم نمەبۊ
جە پەراوێزەو وەنەیە سەرەتایی و کۆتاو شەڕەو هۆرامان و دەسەڵاتەو قاجاڕی.
ئی دوە لاپەڕە جە لاپەڕەکاو (221) و (222)ەو بەرگەو دووی کتێوەو مراتب البلدانی ناصری شرح سلطنە ئامێنێ.
ئی کتێوە (678) لاپەڕێن و جە ساڵەو (1897)ی عیسایینە جە تارانەنە بە زوانی فارسی نووسیان و ئیسە بە ژمارەو BV021275988 هەن جە کتێوخانەو شارەو مونشەنەو هەرېمەو بایرنەو وڵاتەو ئاڵمانینە.
هەرچن وردەکاریەکاو ئی دوە لاپەڕەیە بە تەمامی پەشتڕاس یا ڕەدوە نمەکەر و پەشت بېیەنای تەمام بە نووسیاکاو ئا کتێویە هەڵەن و نووسەر خەتاتەو دەرباری بېیەن و پەی دەسەڵاتی و جە خێرەو دەسەڵاتینە نووسیەنش، وەڵێ لاچەمیە سەرەتای بە کۊ باسەکەیرە مۆزمێ و دەرس و ئەزموونش چەنەن.
ئەر تەماشایە خێرا بە وېیەردەرە کەرمۍ مەوینمێ کە هۆرامان بە درێژایی وېیەردەی جە بوارەو ئابووریوە سەربەویش بېیەن و دەسێش پەی کەسی ناسێنېرە و هەر جە پوشاک و واردەمەنیوە تاکو کەرەستە لازمەکاو ژیوایشا جە سروشتەو هۆرامانی و بە دەسەو ویشا وەششا کەردێنێ. جە بوارەو سیاسیشوە دیسان جە ئاستهایەنە سەربەویش بېیەن و ئیدارەو کۊمەڵایەتی و سیاسی و نیزامی ناوچەکاو هۆرامانی بە دەسەو مەردمی و پیرەکاو هۆرامانی لوان ڕاوە و نموونەش ڕاوەبەردەو ڕاوڕەسمەو ژیرلەومەرێن تاکو دەسەڵاتەو سانەکاو هۆرامانی.
ئی دەسەڵاتەو هۆرامانیە هەر پسەو ئی سەرچەمەیە باسش مەکەرۊ تاکو زەمانەو قاجاڕەکاش هەر بە دەسەو ویشاوە بینەن.
تا یاگیە کە سەعید سۆڵتان یۊ جە سەرکردەکاو هۆرامانی واتەنش: ئەر چڼین هەزار لەشکەرۍ هێرش کەرا سەرەو هۆرامانی و دەوڵەتاکاو ئێرانی و عۆسمانی یۆوێ گېرا، چارەو هۆرامانی نمەکەرا.
دیارەن پسەو سەرچەمەکەی ماچۊ: دەوڵەتەو ئێرانی بە یەرێ فەوجێوە و دوە عەرادێ تۆپێ و قوپوزێوە هێرش مەکرا سەرەو هۆرامانی، بەڵام بە داخەوە چاوەقتەنە فەوجەو کوردستانی و تفەنگچیەکاو بانەی و مەریوان و سەقزی پەیوەسێ موا بە لەشکەرەو قاجاڕیوە و بەیۆوە هێرش مەکرا سەرەو هۆرامانی و دماو شەڕ و بەرنگارییە درێژی لەشکەرەو هۆرامانی مەمێڕیەو. ئا تفەنگچیێ چیرەو دەسەڵاتەو قاجاڕی و دەسەڵاتە مەحەلیەکانە بېیېنۍ و فەرمانشا چەویشا گېرتەن و خراوی ئا خیانەت و نەزانکاریانە کە جە درێژی وېیەردەینە کورد بە کوردیش کەردێنێ زیاتەر یەخێ سەرکەردە ناسیاسیەکا مەگېروە.
ئیدریس پیری.[1]