باسێو کۆتا سەرو جەژنەو ئێساڵوو پیرشالیاری
ئەر دەنگ کەری، دەنگاوەنە
                 دەنگیچ مەکەری، پەنگاوەنە!!
جەژنەو زەماوەنڎەو پیرشالیاروو هۆرامانی، یادگاروو فەرهەنگ و تارێخ و وېیەردەو هۆرامانیا و هەرساڵێو جە گردو یاگەکاو ئێران و دنیای جە هۆرامان و جە زەماوەنڎەو پیرشالیاری، دیڎەن کەرا، بەڵام بڕېو قسێ و باسێ جە لاو بڕېو کەسێ جە هاڵیگای قەسالەین (فەزای مەجازی) تایبەت جە تاقمەو کاناڵەکاو تلێگرام، ئەنێستا و ... هتر. ئاڎیچ بە داخەو جە وېما و هامزوانەکاما جە پەراوێزوو ئی جەژنێ و مەراسێمەکەینە، ئێژایی، هۆویەت و کێ بیەو وېشا بەردشا چېروو پەرس و سوئالێ.
نەرەی واتەن بە پوازەو وېم ترەکوو
    هۆرامان و هۆرامی زوان بە مێمانداری و حورمەت نیای پەی مێمانی نامدارێنێ  و ئینە پەی گرد کەسی ئەونەشاریان، ئەر مێمانێو تاڵشبۊ و خوڎای نەکەردە، تۆشوو گیر و چەڵەمێو ئامابۊ گورج و ئازا لوان پێواشەو و هەرمانەکېش پڕنانە و یام پېسەو مێمانەکەیش کە بە عەزرەتەو پەی وینای و چەم پنەکەوتەو بەرنامەو پیرشالیاری و سەفوو حەی ئەڵڵاو دەروېشەکاو سەرو لەقوو درەختو وەزەکێ پاڵو یانەو پیری کەوتەرە و زامدار بۍ و خەفەتش نېیا سەرو دڵوو گردیماوە و ئەچا وەختەنە ئېمەیچ ئەچاگە بێنمێ و خەڵکوو هۆرامانی و دەوربەر و تایبەت چەمڎاروو مەراسێمەکەی گورج و ئازا مێمانەکەشا یاونا لاو ئامپەلاسەکەی و یاگێ دەسوەشی بۍ و ئەڵبەت شوکر پەی خوڎای بە خێر گېڵاوە و زامەکېش فرێ نەبېنێ و هەواڵوو سڵامەتیش جە زوانو وېشنە جە فەزای مەجازی و کاناڵەکانە، وەڵا کریاوە.
واتەو ئینەیە: دار و درەخت لاو گردیما تایبەت خەڵکوو هۆرامانی و تایبەتەریچ وەزی درەختو بوومی و وېمانەو مەحاڵەو هۆرامانیا و یاگێ ئێژایی و هەمیەتین و بڕیای لەق و شاخوو درەختەکەی هەرمانێوە عالە نەبۍ و چنی ژیوگاپارێزنای خەڵکەکەیما فرە دوور بۍ (هەرچن واتەنشا پەی یانەو ساحێب وەزەکێ بېیەن بائێسوو گیر و گرێفت ترەکنای دیواروو یانەیش، ئەڵبەت دماتەر تاوێ چارەسەرش کەرۍ و نەک چل و لەقوو درەختی بەسەزوانی بڕیۊ هەتا مێمانێوتەر ئازار نەدریۆ ، ئەڵبەت درەخت یاگێ نشینگا و جەولانوو مێمانی نەبۍ و وەختوو وەز تەکنایچ نەبۍ! مێمان نەوازی هۆرامی زوانی هەتا یاگێوا چل و لەقوو درەختی بەسەزوان پاچیۆرە و هەتا مێمان وەشتەرشبۊ! واچی چېش؟؟
گلێرەوبېیەی خەڵکەکەی جە وېمانە و مێمان ئەچا یاگێنە (وەروو یانەو پیری) و سەرو بانەکاو دەوروبەری (ئەژماروو خەڵکەکەی فرەتەر بېیەن و بانو یانەکا ئا وەزنێ هۊر نمەگېرۆ)، یاگێوە سەخت و سەخڵەتەنە و مشیۊ چارەسەری یەکجاری کریۆ، ئەڵبەت هەتا ئیسە مێمانەکاو پیروو هۆرامانی بە وەشی و سڵامەتی گېڵەنێوە پەی یانە و وەڵاتوو وېشا.
خاڵێوەتەرە سەرو پلاماروو کەسیێوی دڵپاک و ناتەمامی جەسە و ڕۊحی و سەندرومی بە نامۍ مەڵڵاعێرفان ، کە دووربینوو مێمانیوی (ئەڵبەت بنەڕەتنە خەڵکووهۆرامان تەختی بێ) و شوکرانەشبۊ کاکەی دووربین بەدەس بە زوانی شیرین مەڵڵاعێرفانش لاوناوە و جە حەرەکەتوو مەڵڵاعێرفانی دڵوەر نەبېیەن و واتەو ئینەی جە فرەو یاگەکانە پەیوەندیشا گېرتەن و واتەنشا ئەر دوربینوو خەبەرگوزارەکەی خرابېیابۊ حازرێنمێ خەرجەکەش بڎەیمێ و ئینەیچ مەڵڵاعێرفانی ئەپا جۊرە گردیما مژناسمێش و ئەژناسیان جە فیلمێوەنە جە فیلمبەردارەکەی داوا عەفوە و بەخشای کەرۊ کە ئینە وېش ئەوپەڕوو قسێن، مەڵڵاعێرفان دنیاو وېشەنه سەیر و سلووکی عارێفانە کەرۊ، ئېمە و هیچ کەس خەبەردار نېیا و فەقەت هەرچی کەس، خوڎا، وېش مزانۆ ، هەرچن داوا بەخشای و عەفوێ، گەورەیی ئا کەسیە مرمانۆ، بەڵام مەڵڵاعێرفان، جیاواز بێ.
هومایون موحەممەدنژاد.[1]