نامې: حەمەحسێن
نازنام: کێمنەی
نامۊ تاتەی: حەمە یوسف
ساڵۊ پېڎابېیەی: 1924ز.
یاگۊ پېڎابېیەی: #کێمنە_ هۆرامان#
$ژیۋاینامە$
مامۊسا حەمەحسێن کێمنەی، دەگاو کێمنەی، بەشو لهونی ئامان دنیاوە، بنەیانەکەشان دەنگ وەشې و بەهرەمەڼې بیېنې. مامۊسا حەمەحسێن دوې جار هامسەرگیریش کەرڎەن، جاری یەکەم دلې هۆرامانینە، جاری دوەم ناوچەو گەرمیانی.
نازنامو (خالیدی) وەرچەمو بنەیانەکەیشانە، واتا پی نامې ئەشناسیێنې، فرېشان دەنگشان وەش هەن، سیروان خالیدی و دڵسۊز خالیدی دۋې کوڕې مامۊسا حەمەحسێنینې کە هونەمەڼې و دەنگ وەشېنې.
حەمەحسێن کێمنەی هەر جە دەمو زاروڵەییشۆ دەسش دانەنە کاری هونەری گورانی واتەی، تەمەنێ فرەش چا دەرەتانەنە گوزەرنان، سەڎان بەرهەمې بەرزې و ڕەسەنېش تۊمارې کەردېنې، بەزمې سیاوچەمانەی دیمێ ڕۊشنو ئی بەهرەمەڼە بە سەلېقەو بە تەوانایەنە.
ئی هونەرمەڼە بەهرەدارە ژیوای تەمەنیشەنە هۆراز و لېژایې فرې ئامێنې ڕاش، سەردەمانێ ئاوارەو گەرمیانی بییەن، دلې شارو کەلارېنە ژیوان، ئەچاگەیچ ئاوازە ڕەسەنەکې سیاوچەمانەیش دێنې گۊشا خەڵکو ئا ناوچێرە، دلې مېمانداریێنە ئاوازو (سەلە سەلە) یش چڕیەن، تاکو ئیسەیچ تېکەڵو ڕۊحو ئا خەڵکەیە بییەن و هەر دەم وەرو وېشارە ماچاشۆ.
حەمەحسێن کێمنەی چەنی گۊرانیواچە نامڎارەکا هۆرامانی پېسە: مامۊسا عوسمان هۆرامی و شەفیع کێمنەی و جەمیل نۆسووڎیی و سەباح خارگېڵانەیی، ...هتر گۊرانیېش واتېنې.
مامۊسا حەمەحسێن ئیسە تەمەنش لوان و یاوان نزیکۆ سەڎ ساڵا، تەواناو گۊرانی واتەیش بە عالی نەمەنېنە، دلې خانەواڎە و قۆم و قیلەیشەنە بە ئیحتیرامۆ ژیوای گوزەرنۊن.
ئەسعەد ڕەشید.[1]