کورد دلۍ چەرخەکا تارېخینە
هۊرئەوەگېڵنای و ئاماڎەکەرڎەی: ئەسعەد ڕەشید
بەشۍ: سەڎ و دەهەمە
* ساڵەو (1746ز.): ئەچی ساڵېنە مەلا عەبدوڵڵای بێتوشی شاعېر ئامان دنیاوە. هەر ئەچی ساڵېنە نویسەر و شاعېر شېخ حوسێنی مەولاناوا کوشییان. پێمانو ئەرزەڕۆمی یەکەمی میانو ئێران و عوسمانییەکانە بەسیان.
* سالەو (1747ز.): سلېمان پاشا ئەچی ساڵېنە بییەن بە میرو بابانی. نادرشا ئەچی ساڵېنە هېرشش کەرڎەن پەی سەرو کوردەکانو خوراسانی. تاریخو (19-06- 1747ز.) نادرشاو ئەفشاری کوشییان جە کاتو هېرش کەرڎەیشەنە پەی سەرو کوردەکا خوراسانی، باری ڕامیار ئێرانی شېویانو زەندییەکۍ دەسشان گېرتەن ملو فەرمانڕەوایی ئێرانیرە.
* ساڵەو (1748ز.): شەریف خانو هەکاری شاعېر، ئەچی ساڵېنە کۊچی دمایینش کەرڎەن. هەم شەریف خانو چۊڵەمێرگی شاعېر، دلۍ شارو چۊڵەمێرگی سەرینینە کۊچی دمایینش کەرڎەن.
* ساڵەو (1749ز.): سەلیم پاشا هەمدیسان چی ساڵېنە بېیەنۆ بە میرو بابانی.
* سالەو (1750ز.): چن تۊمارێ دلۍ تۊمارگاو شۊنەوارئەشناسەکانە پەی ئېمە مەنېنێ کە تاریخشان مەگېڵۊوە پەی ئی ساڵۍ:
* عوسمان پاشاو بابانی دمای ئانەی جە سوڵتانی عوسمانی یاخی مەبۊن، ماوێ دلۍ کەشو (ئاوەگرڎ)ینە مەنەنۆ.
* کۊچی دمایینو میر ئەحمەڎ بەگو زەنگەنەی.
* فەرمانڕەوایی کەریم خانو زەندی سەرو تەختو ئێرانیۆ.
* سڵێمان پاشا، هەمدیس بییەنۆ بە میرو بابانی و سەردەمو ئاڎینە ناوچەکانو زەنگەباد، مەندەلی، بەدرە و جەسان، بەشێ بیېنۍ جە میرنشینەکەی، هەر جە سەردەمو ئېڎیینە بېیەن کە نەوەشی چەمەقووڵە (تاعون)ە گۆرەکەی دلۍ کوردەسانینە وەڵابېیەنۆ.
بەشێ جە کتېبو هاوڕێنامەی، نویستەی هاوڕێ باخەوان، هۊرگېڵنای پەی سەرو زوانی هۆرامی: ئەسعەد ڕەشید.
[1]