زوانی ئەڎایی کڕیڵوو ئەنەیاویەن جە ژیوای
پڵاتفۆرموو هۆرامی بە بۊنەو 2 سیاوکامی (21 فێبروێی) ڕۊ جەهانی زوانی ئەڎاییۆ، ڕۊ زوانی ئەڎایی جە گردو مرۊڤایەتی و بە تایبەت هۆرامی زوانا پیرۊز کەرۊن.
سەڕەڕاو پیرۊز کەردەو ڕۊ زوانی ئەڎایی جە گردو مرۊڤایەتی و بە تایبەت هۆرامی زوانا، مشۊم ئا ڕاسیا باس کەرمۍ کە هەنێ . ئینسان بە زوان جەهانش پەێ وېش مانا بەخشا. تێکەڵاوی ئینسانی و ژیوگەی بە زوانی ئەڎایی گەشەش کەرد . مخابن بە سەر هۆرداو دەسەڵاتی زوان پسۆ ئامڕازێ پەی جە یۆی یاواینە ، بی بە ئەمڕازێ پەی شۆرتەیۆ مەژگوو فرەو ئینسانەکا و بنەڕەت نیاو ویروو فاشزیمی. دیکتاتورەکۍ و دەسەڵاتدارەکێ بە واڕاو ڕۊڕەوە سروشتی زوانی جەهانشا تووشوو گرفتێ کەرد کە تاکو ئاڕۆیچ مرۊڤایەتی باجش مڎۆ. جە وەختێنی کە زوان کڕێڵوو چارەسەری گردو گرفتەکا بۍ، جە وەختێ کە زوان سەر چەمەو چڕاو ئاواز و سروودا پەی ژیوای بۍ . جە وەختێ کە زوان پردەو پەیوەندی گردو نەتەوە جیاکا بۍ . بەلام بە هەرمانە ئاوردەو زوانی جە لاو دەسەڵاتیوە زوان بی بە ئەمڕازوو تاونایۆ و کۊشتەی ئینسانەکا و نەتەوەکا تەری .
جە سەردەمێنێ ژیومی کە فرەو دەۆڵەت – نەتەوەکا پەێ مەنەیۊ سەرو تەختو دەسەڵاتیوە بە هەزاران ئینسانېشا بە بۊنەی قسە کردەی، نویستەی و وانای بە زوانی ئەڎایی وېشاوە، جە سیاو چاڵەکانە زینانی کەردێنی . یا دەسەڵاتدارانی پسۆ ئێران و تورکیە فرەو چالاکا مەدەنیشا پسۆ زارا مەحەمەدی بە زینان و فەرزاد کەمانگەرشا بە کېشتەی گېیانیش سزێ دەینێ . بە سیاسی کەردەو پەرسەو زوانی جە هەر دەوە بەشەکانا یاوان بە مەڕزوو فاشیزمی و ئاخېزی . دەسەڵاتوازەکێ جە ڕاو زوانی فاشیزمی پەنە یاونا و ئازادیوازەکا جە وەرانوەروو ئی ویر تەنگیەوە پەێ مەنەیۊ شۆناما و بېیەیشا زوانی پسۆ ئامڕازێ پەێ ئاخېزی سوور کەراوە .
نەتەوەو کوردی پسۆ یۊ جە نەتەوە چېر دەسەکا بە ساڵانا کە جە لاو نەیارەکاشۆ هەرمانە پەی تاونایشۆ کەرا . سەرەڕاو گردو ئا هەڕەشا، دۆڵەمەندی زوانی و فەرهەنگی نەتەوەکەیما تاکو ئاڕۆ ئیمەیش ئاستێنمێوە، بەڵام بە بەرکەوتەو دونیاو تۆکنۆڵۆژی مەتەرسیەکێ سەرو نەوەکا و چینوو جوانا زیاتەر بېیەن . پۆچی پەنەوازەن گرد کوردێ و گرد سازە و ڕیکوزیایە بە زیاتەر جە جارانی پەێ پارێزناو زوانی ئەڎایی وېش ڕیکوزۆ . زوانی هۆرامیج پسۆ بەشێ جە خانەوادەو زوان و کوردی یۊ چا زوانانە کە تەرسەو نەمەنەیش فرێةی . پڵاتفۆرموو هۆرام-ی بانگ جە گرد هۆرامی زوانێ کەرۊ کە پەێ پاڕېزناو بنەڕەتو زوان و کوردی و بەشێ کۆن و فەرهەنگ و جەهانی جە پارێزناو زوانەکەیشانە کۊشېیاو وېشا بەرفراوان تەر کەرا . ئاڕۆ زوان کۊڵەکێ مەنەیۊ و کڕێڵوو یاواینەن جە ژیوای . پەێ ئانەی وېما بیمێ و مەنمێوە مشۊم تاکو یاوای بە سیستموو وانای پەێ زاڕۆڵەکا نەتەوەکەیما گرد ڕوێ پەێ پاڕېزناو زوانی کۊشېیاو وېما بە سۊزی بازمێوە .
پلاتفۆرمو هۆرامی.[1]