شەۋۊ یەڵدای و (فېربېیەی زۋانی ھۆرامی) بە گەمەکەرڎەی دیجیتاڵیی
نویستەی: #ئاکۆ مارانی#
دیاری شەۋۊ یەڵدای پەی زاڕۊڵە هۆرامی-زۋانەکا
ۋەڵۍ ئەۋەکەرڎەی بۊخچەو دیارییەکەی، من جە زاڕۊڵە هۆرامی-زۋانەکا و ھەر زاڕۊڵېۋی تەری، کە حەزکەرۊ زۋانی هۊرامی فېربۊ، بەخشای موازۇ، چۇنکە دیارییەکەو من پەی ئاڎیشا دماکۊت و بڕیاربۍ من ئی دیارییەیە پېسەو دیاری (ڕۊ جەھانیی زۋانی ئەڎایی) یان (ڕۊ نۊرۊزی) یان ڕۊ جەھانیی زاڕۆڵا) بە شمەی ئازیزی پېشکەشکەرۇ.
بەڵام فرە بەداخۆ نەوەشیۍ و گرفتارېییەکۍ ئی ساڵە ۋېیەرڎۍ دیارییەکەو منشا پەی شمەی ئازیزی دما ۋست و پەی ئۍ شەۋی ( شەۋۊ یەڵدای) مەنۆ. جە ئا بارۆ ھومېڎواز ھەنا، کە چنی بەخشای من، دیارییەکە شاییستەو دنیا پاک و بېگەرڎ و ڕەنگېنەکەو خېیاڵو شمەی ئازیزی بۊ.
ئۍ شەۋ منیچ چنی شمەی ئازیزی بە یاڎو بېبەشیی سەردەمو زاڕۊڵەیی وېم، دنیای دیجیتاڵەنە و بەرو مەرزەکا دەسەڵاتو ئەسیمیلاکەرڎەی و شۆڤینیزمی، بە زۋانی ئەڎایی وېم گەمەکەرۇ؛ چېۋېۋ کە گۆرەبېیەی وەرمەکا سەردەمو زاڕۊڵەی وېم و ھامتەنەکا وېم بېیەن و وڵاتە و وڵات و شارە و شار چنی وېم گېڵنانم و بە کۊڵۍ دەربەدەریی کېشمکەرڎەن، تاکو ڕۋېۋ بتاۋۇ بەدیشبارۇ و بە شمەی ئازیزیش بیاۋنۇ و شمە پېسەو من و هام-تەمەنەکا من بېبەشۍ نەبیدۍ و ئاۋاتەکېتا بەدیبەیا.
ئازیزاو من، ئی دیارییە ۋەرەنجامو کۊششە بەردەۋامەکا منی بېبەشین جە وانای زۋانی ئەڎایی و گرڎ ڕۋېۋ من پەی گرنگیدای بە زۋانی هۆرامی و پارېزنایش جە فۊتېیای و بەدیئاۋرڎەو ۋەرمەکا زاڕۊڵەی وېم و وەشڵێکا ئیسەو شمەی ئازیزی، ئۆ بەرەو کەسە مرۆڤدۊسەکا جەهانی تەقەمڎەو و تکاکەرۇ.
پەی ئا مەبەسەیە، ھومېڎواز ھەنا، کە ساڵۊ (2021) گرفتارېېیەکۍ ڕۊزگاری بواربڎا، تاکو فرەتەر بتاۋمۍ زۋانی ئەڎایی وېما پېسەو زۋانەکا تەری پارېزنمۍ و وانای بە زۋانی هۆرامی بۊ بە یۊ جە ئاۋات و حەزە بەدیئاماکاو ئېمە و ئېمەیچ پېسەو گرڎ کەسېۋی تەری ئازاڎانە بە زۋانی ئەڎایی وېما بوانمۍ و بنۋیسمۍ و گەمۍ کەرمۍ و حەز و ئارەزۇەکا وېما بە کۊمەڵەکا تەرو سەرتاسەرو جەھانی بېیاۋنمۍ و بژناسنمۍ.
پاسە ۋەڵینا ۋاتەن دېیاری شوانەکڵەی هاڵەکۊکېیەنە و دیاری مەتیلېچ ڕازۊ پاڵو ھارگێ و دېیاری منی چل ساڵ ئاۋارەیچ پېشکەرڎەی (گەمېۋۍ دیجیتاڵیینەیە پەی فېربېیەی زۋانی هۆرامی) بە شمەی ئازیزی، ھەر یاگېۋۊ جەھانییەنە ھەندۍ و مژیۋدۍ!
شەۋۊ یەڵدایتا ڕەنگینە و چنی خېزانی و یاۋەراتا جەمۍ و دڵوەشۍ بنیشدۍ و تاکو حەزتا موازۊ، پېۋەرە گەمۍ کەرڎۍ و گۊرانیۍ ۋاچدۍ و ڕازەکا دەرۇنیتا پەی یەکتری گېڵندېۋە و ئارەزووەکاتا چنی یەکدی بەشکەرڎۍ و زانیارییەکاتا بە یەکتری بەخشدۍ و پەیۋەڼییە کۊمەڵایەتییەکا وېتا بەهېزتەر کەردۍ.
فەرماۋدۍ شمەو بۊخچەو دیارییەکەو من:
چنین بەشداریکەرڎەی گەمەو فېربېیەی زۋانی ھۊرامی؟
- ئەر دەزگاکەو شمە سمارتفۆن و دێسکتۆپ و لێپتۆپ بۊ، سەرو ئا لینکەیە کلیککەردۍ:
گەمەکۍ فېربېیەی نامۊ ژمارەکا، نامۊ ڕۋەکا، نامۊ مانگەکا، نامۊ وارڎەکا، نامۊ مېۋەکا بە هۆرامی کلیککەردۍ:
https://www.digitaldialects.com/Horami.htm
ئەر دەزگاکەو شمە ئایفۆن و ئایپێد بۊ، سەرو ئا دۋە لینکەیە کلیککەردۍ
گەمۊ فېربېیەو نامۊ وارڎەکا
https://www.digitaldialects.com/iPad/Horami/food.htm
گەمۊ فېربېیەو نامۊ مېۋەکا
https://www.digitaldialects.com/iPad/Horami/fruit.htm
یاۋەرو گولانەی و گۊرەیتا
سەرنج و ئاگاداریی:
1- ۋەرو ئانەی کە سەرپەرشتیکەرو پڕۆژەکەی کەسېۋی هۆرامی-زۋان نېیا و ھەر پاسە سیستەمو نۋیستەی پرۆژەکەی پەشتیۋانی ئەلفابێتی ئارامی عەرەبی نمەکەرۊ، ۋاچەکۍ بە نیگارکېشی نۋیسیێنۍ و دۋۍ ۋاچۍ نادرۊس نۋیسیێنۍ، کە ئانە درۊس-نۋیستەیشان و ئایەندەنە ڕاسېکریاۋە:
- شش [نادرۊس] = شېش [درۊس]
- یانزە [نادرۊس] = یاڼزە [درۊس]
- شوت [نادرۊس] = شۊت [درۊس]
2- ھامکاتو گەمەکەرڎەی بە ۋاچە هۆرامییەکا، ئېمە متاۋمۍ ھامۋاتا ئینگلیزییەکەیچشا فېرېبیمۍ.
3- ھەر زاڕۊڵېۋ [ چ کناچۍ و چ کوڕ] ئارەزۇمەڼ بۊ، جە پڕۆژەکەی پەشتیۋانیکەرۊ، متاۋۊ بە دەنگو وېش نامۊ ژمارەکا، نامۊ مېۋەکا، نامۊ وارڎەکا، نامۊ مانگ و نامۊ ڕۋە بە هۆرامی تۊمارکەرۊ و بە ئی ئیمەیل ئەدرەسە [ ako.maran@gmail.com ] ، یان بە ئی ژمارە تێلەفۆنە [ 004917675583232 ] جە تێلەگرام @AkuMarani یان وۊتسئێپ پەی من کېیانۊ. دماو ئەژنەۋیەی و هۊرسەنگنای و بەراۋرڎکەرڎەی تۊمارە دەنگییەکا، خاستەرین و سافتەرین ۋاچۍ تۊمارکریێ هۊرۋچنیا و منریا یاگۊ تۊمارە دەنگییەکا من.[1]