دەسی بۍ دەسەڵاتتا خۊ ژنیەن
دەسی بۍ دەسەڵاتتا خۊ ژنیەن؟ پەی مەرگی یا پەی چېشی؟ گاهەس واچمێ یا واچدێ: مەرگو ئازیزێوەنە دەسما، بۍ دەسەڵاتا، بەڵام ئی جارە من ماچوو، هېزی شەوۍ، شەققەو نیمەشەوی تاتەیوە ملەگاو پرڎوو کوڵووشوو ناوێنە، ژەن و زاوڵەش ئاوێ هێناسە چنیێ و ئاڎ بە هاوارێ شەپۆلەو جگەری سۆتەیش ماڵاش دلۍ شاناو پەنگاو داریانیرە. ئی تاتە بۍ دەسی، بۍ دەسەڵاتەرین کەسېوە کە ژەنیش و ڕۊڵەش بنوو ئاوێنە، خنیکیەینە باوشەو هەنگەری.
ئەڎایېوە کە حەتمەن تاکو ئاخرین هێناسێوە کە شمشاش دان جبەر و تاخەیت بنوو ئاوێچنە، گېڵەینە شۆنوو لاشەو ڕۊڵەیشرە. لوا و وەشڵەیش پەنە کە دووکەڵوو جگەریش، پێسنەو پیاکەیش لەو ئاوەکێنە بەرز نەبیوە و نەدەیا ملو مڵکوو کوڵووشوو ناۋېرە و هەجیجیرە.
ئێساڵ بڵ فرە تەقا، پەنگاو گیریاوە و وەڵات نیشتەو سەرو ئاوێ. هېزی شەوېچ دیڎەو فەرشاد زۆمیچ هەرسی وارنێ، دەروونش سۆت و چەمېش پەڵەو هەرساشا دا.
دیوارېوە، حەسارێوە تاوێ هېزی شەوۍ پتەوتەر جە پەنگاو داریانی بۊ، تاوێ هێقمتەر و ئوکسیژن دارتەربۊ جە باوشوو ئەڎایېوە پەی ڕۊڵەکەیش. حەسار نەبی و ویژدان مشۊم واچۆ: چی؟!
ئاوی گېڵیانە وەڵاتی و هێناسەش چنی و ئێتر هەر وەڵات وەسێ بێ.
مێهران ئەحمەدی.[1]